ରଣପୁର,୩।୧୨(ସ୍ବ.ପ୍ର.)-ନୟାଗଡ ଜିଲା ରଣପୁର ବ୍ଲକର ତଲାରିବନ୍ଧ ରାଜସ୍ବ ଗଁାର ମାନ୍ୟତା ପାଇବା ଜଣାପଡିବା ପରେ ବିବାଦୀୟ ପରିସ୍ଥିତି ସୃଷ୍ଟି ହୋଇଛି । ଏହାର ପ୍ରତିବାଦରେ ଡମସାହିଠାରେ ନୂଆ ଜଗନ୍ନାଥ ସଡକକୁ ସୋମବାର ପୂର୍ବାହ୍ନ ୭ଟାରୁ ଅପରାହ୍ନ ୪ଟା ଯାଏ ଅବରୋଧ କରାଯାଇଥିଲା। ତଲାରିବନ୍ଧ ନୂଆ ରାଜସ୍ବ ଗଁାର ମାନ୍ୟତା ପାଇବାକୁ ଯାଉଥିବାବେଳେ ଡମସାହି ମୌଜାର ଗୋଚର ଜମି, କାଜୁ ଜଙ୍ଗଲ ଓ ଦଳିତ ସାହି ବାଦ୍ ପଡିଯାଉଛି । ତେଣୁ ପ୍ରତିବାଦ କରି ଡମସାହି ଗଁା ଲୋକେ ରାସ୍ତାରୋକୋ କରିଥିଲେ। ରଣପୁର ତହସିଲଦାର ସୁଶାନ୍ତ କୁମାର ପତି ପୂର୍ବାହ୍ନରେ ଡମସାହିଠାରେ ପହଞ୍ଚି ଆନ୍ଦୋଳନକାରୀଙ୍କୁ ବୁଝାଶୁଝା କରିଥିଲେ ମଧ୍ୟ ସୁଫଳ ମିଳି ନ ଥିଲା । ସନ୍ଧ୍ୟାରେ ନୟାଗଡ ଉପଜିଲାପାଳ ଲଗ୍ନଜିତ ରାଉତରାୟ ପହଞ୍ଚି ଆନ୍ଦୋଳନକାରୀଙ୍କୁ ବୁଝାଶୁଝା କରିଥିଲେ । ଏ ସଂକ୍ରାନ୍ତରେ ସରକାରୀ ସ୍ତରରେ ପଦକ୍ଷେପ ନିଆ ଯାଉଥିବାରୁ ଉଚ୍ଚ ଅଧିକାରୀଙ୍କୁ ଭେଟି ସମାଧାନ କରିବାକୁ ଗଁାଲୋକଙ୍କୁ ପ୍ରସ୍ତାବ ଦେଇଥିଲେ । ଉପଜିଳାପାଳଙ୍କ ପ୍ରସ୍ତାବକୁ ମାନି ଗଁାଲୋକ ଅପରାହ୍ନ ୪ଟାରେ ରାସ୍ତାରୋକୋ ପ୍ରତ୍ୟାହୃତ କରିଥିଲେ ।
