କାବୁଲ,୨ା୧: ଉତ୍ତର ଆଫଗାନିସ୍ତାନରେ ତାଲିବାନମାନେ ସୁରକ୍ଷାକର୍ମୀଙ୍କୁ ଟାର୍ଗେଟ କରିଛନ୍ତି। ବିଭିନ୍ନ ସ୍ଥାନରେ ସେମାନେ ଆକ୍ରମଣ କରିଥିବାବେଳେ ଏଥିରେ ୨୬ ଜଣ ଆଫ୍ଗାନ ସୈନ୍ୟ ପ୍ରାଣ ହରାଇଥିବା ଜଣାପଡ଼ିଛି। ତାଲିବାନ ପକ୍ଷରୁ ଏହି ଆକ୍ରମଣ ଲାଗି ନିଜକୁ ଦାୟୀ କରାଯାଇଛି। ଉତ୍ତର କୁନ୍ଦୁଜ୍ର ଏକ ପୋଲିସ ଚେକ୍ ପଏଣ୍ଟରେ ତାଲିବାନମାନେ ଆକ୍ରମଣ କରିବାରୁ ୧୦ ଆଫ୍ଗାନ ଯବାନ ପ୍ରାଣ ହରାଇଥିବାବେଳେ ୪ ଆହତ ହୋଇଛନ୍ତି। ସେହିଭଳି ବାଲ୍ଖ ପ୍ରଦେଶର ଏକ ପୋଲିସ ଚେକ୍ପଏଣ୍ଟରେ ଆକ୍ରମଣ କରାଯିବାରୁ ୯ ପୋଲିସ ଅଧିକାରୀ ପ୍ରାଣ ହରାଇଥିବା କୁହାଯାଇଛି। ତୃତୀୟ ଆକ୍ରମଣ ତଖାର ପ୍ରଦେଶରେ ତାଲିବାନ ପକ୍ଷରୁ କରାଯାଇଥିବାବେଳେ ୭ ସୁରକ୍ଷାକର୍ମୀ ଏଥିରେ ପ୍ରାଣ ହରାଇଛନ୍ତି। ଗୁଳି ବିନିମୟରେ ୧୦ ତାଲିବାନ ଆତଙ୍କବାଦୀ ପ୍ରାଣ ହରାଇଛନ୍ତି। ଗତ ସୋମବାର ଜଜ୍ଜାନ ପ୍ରଦେଶରେ ସେମାନେ ୧୪ ଆଫ୍ଗାନ ସୁରକ୍ଷାକର୍ମୀଙ୍କୁ ହତ୍ୟା କରିଥିଲେ। ପ୍ରକାଶଥାଉ କି, ଗତ ୨ ଦିନ ଧରି ତାଲିବାନ ଗୋଷ୍ଠୀ ପକ୍ଷରୁ ବିଭିନ୍ନ ସ୍ଥାନରେ ଏଭଳି ଆକ୍ରମଣ ଜାରି ରହିଛି।
