ବିଶାଖାପାଟଣା: ଥାନାରେ ପୋଲିସ୍ କର୍ମଚାରୀଙ୍କୁ କାମରେ ସହଯୋଗ କରିବ ରୋବୋ। ଏତଲା ରଖିବାଠାରୁ ଆରମ୍ଭ କରି ମାମଲା ସମାଧାନ ହେବାରେ ଏହା ଗୁରୁତ୍ୱପୂର୍ଣ୍ଣ ଦାୟିତ୍ୱ ନିର୍ବାହ କରିବ। ସାଇବର ଅପରାଧୀଙ୍କୁ ଧରିବା ପାଇଁ ଆନ୍ଧ୍ରପ୍ରଦେଶ ପୋଲିସ ପକ୍ଷରୁ ପ୍ରଥମ ଥର ପାଇଁ ବିଶାଖାପାଟଣାର ମହାଶନିପେଟା ଥାନାରେ ଏକ ରୋବୋ ‘ସାଇବିରା’ ନିଯୁକ୍ତ କରାଯାଇଛି। ‘ସାଇବିରା’ ଏତଲା ରେଜିଷ୍ଟର କରିବା ସହ ଏହାର ତ୍ୱରିତ ସମାଧାନ ପାଇଁ ପୋଲିସକୁ ସହଯୋଗ କରିବ। ସାଇବିରାକୁ ଷ୍ଟାର୍ଟଅପ୍ କମ୍ପାନୀ ରୋବୋ କପ୍ଲର୍ ପ୍ରାଇଭେଟ୍ ଲିମିଟେଡ୍ ପକ୍ଷରୁ ଡେଭଲପ୍ କରାଯାଇଛି। କମ୍ପାନୀର କର୍ମଚାରୀ ଦିନେଶ କୁମାର ଇରାବତଙ୍କ କହିବା ଅନୁସାରେ, ଆନ୍ଧ୍ରପ୍ରଦେଶରେ ପ୍ରଥମ କରି ଲଞ୍ଚ ହୋଇଥିବା ଏହି ରୋର୍ବୋକୁ ଇ-କୋପ୍ ଆଧାରରେ ତିଆରି କରାଯାଇଛି। ଏହା ପୋଲିସ୍କୁ କାମରେ ସାହାଯ୍ୟ କରିବା ସହ ସମୟ ମଧ୍ୟ ବଞ୍ଚାଇବ। ଯଦି ତଦନ୍ତକାରୀ ଅଫିସର ୨୪ ଘଣ୍ଟା ଭିତରେ କେସ୍ ସମାଧାନ କରି ନ ପାରନ୍ତି, ତା’ହେଲେ ସାଇବିରା ଏହାର ରିପୋର୍ଟ ସିନିୟର ଅଫିସର୍ ଓ ମୁଖ୍ୟମନ୍ତ୍ରୀଙ୍କ ଅଫିସ୍କୁ ପଠାଇଦେବ। ବିଭିନ୍ନ ସମସ୍ୟାର ସମାଧାନ ଲାଗି ସାଇବିରା ଦେହରେ ୧୩୮ ପ୍ରକାର ଆପ୍ଲିକେଶନ ଇନ୍ଷ୍ଟଲ କରାଯାଇଛି। ଏହା ଦେହରେ ଲାଗିଥିବା ୧୩ ଟି କ୍ୟାମେରା ୩୬୦ ଡିଗ୍ରୀରେ ୨୪ ଘଣ୍ଟା ବୁଲୁଥାଏ। ଏଥିସହ ରୋବୋ କ୍ୟାମେରା ଆଗରେ କେହି ଅପରାଧୀ ଚାଲିଗଲେ ଏଥିରୁ ସଙ୍ଗେ ସଙ୍ଗେ କଣ୍ଟ୍ରୋଲ ରୁମ୍କୁ ମେସେଜ୍ ଚାଲିଯାଇଥାଏ। କମ୍ପାନୀର ସିଇଓ ପ୍ରବୀଣ ମଲ୍ଲା କୁହନ୍ତି, ପ୍ରତ୍ୟେକ ଅଭିଯୋଗର ସମାଧାନ ପାଇଁ ରୋବୋ ସର୍ବାଧିକ ୩ ଦିନ ସମୟ ନେଇଥାଏ। ଏଥିରେ ଭଏସ୍ କମାଣ୍ଡ ଓ ଟାଇପିଂ କରି ଅଭିଯୋଗ ରେଜିଷ୍ଟ୍ରର କରାଯାଇପାରିବ।
