କାମାକ୍ଷାନଗର, ୨୫।୮(ଡି.ଏନ.ଏ.) – କାମାକ୍ଷାନଗର ସରସ୍ବତୀ ଶିଶୁମନ୍ଦିରରେ ଶନିବାର ସଙ୍କୁଳସ୍ତରୀୟ ଜ୍ଞାନ ବିଜ୍ଞାନ ମେଳା ଅନୁଷ୍ଠିତ ହୋଇଯାଇଛି। ଏଥିରେ ୯ ଶିକ୍ଷାନୁଷ୍ଠାନର ୧୩୯ ଛାତ୍ରୀଛାତ୍ର ଅଂଶଗ୍ରହଣ କରିଥିଲେ। ମୋଟ ୨୫ ପ୍ରକଳ୍ପ ପ୍ରଦର୍ଶିତ ହୋଇଥିଲା। ଶକ୍ତି ସଂରକ୍ଷଣ, ବାୟୁ ପ୍ରଦୂଷଣ, ନୂତନ ପ୍ରୟୋଗ, ଖାଦ୍ୟ ଶୃଙ୍ଖଳ, ଗଣିତ ପ୍ରଶ୍ନ ମଞ୍ଚ, ସଂସ୍କୃତ ଜ୍ଞାନ ଆଦି ବିଷୟରେ କୁନି ବୈଜ୍ଞାନିକମାନେ ପ୍ରକଳ୍ପ ପ୍ରସ୍ତୁତ କରି ନିଜର ଦକ୍ଷତାର ପରିଚୟ ଦେଇଥିଲେ।
କାମାକ୍ଷାନଗର ଏନ୍ଏସି ନିର୍ବାହୀ ଅଧିକାରୀ ଇଂ. ବିରଜା ପ୍ରସାଦ ରଥ ମୁଖ୍ୟଅତିଥି ଭାବେ ଯୋଗଦେଇ କାର୍ଯ୍ୟକ୍ରମକୁ ଉଦ୍ଘାଟନ କରିଥିଲେ। ଉଦ୍ଯାପନୀ ଉତ୍ସବରେ ଅବସରପ୍ରାପ୍ତ ପ୍ରଧାନ ଶିକ୍ଷକ ବଟକୃଷ୍ଣ ଦାସ, ପରିଚାଳନା କମିଟି ସଭାପତି ସଞ୍ଜୀବ ମିଶ୍ର, ସମ୍ପାଦକ ପ୍ରଫୁଲ୍ଲ କୁମାର ସାହୁ, ଉପସଭାପତି ବିଜୟ କୁମାର ସେନାପତି ଯୋଗଦେଇ କୃତୀ ପ୍ରତିଯୋଗୀଙ୍କୁ ପ୍ରମାଣପତ୍ର ଦେଇ ପୁରସ୍କୃତ କରିଥିଲେ। ପ୍ରଧାନ ଆଚାର୍ଯ୍ୟ ତଥା ସଙ୍କୁଳ ପ୍ରମୁଖ ଗୌରଚନ୍ଦ୍ର ନନ୍ଦଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ବିଜ୍ଞାନ ଶିକ୍ଷକ ଧ୍ରୁବ ଚରଣ ସୁନ୍ଦରାୟ, ସୌଭାଗ୍ୟ ନନ୍ଦ, ପ୍ରବୋଧ ମହାପାତ୍ର, ମହେଶ୍ୱର ବେହେରା, ତପନ ଶତପଥୀ, ବିନୋଦ ସାହୁ, ପ୍ରସନ୍ନ ବିଶ୍ବାଳ ବିଚାରକ ଭାବେ ଯୋଗଦେଇଥିଲେ। ସହ ପ୍ରଧାନ ଆଚାର୍ଯ୍ୟ ଦୁଷ୍ମନ୍ତ କୁମାର ସାହୁ, ନିରୀକ୍ଷକ ନିର୍ମଳ ସେନାପତି, ବିଜ୍ଞାନ ପ୍ରମୁଖ କାମାକ୍ଷା ପ୍ରସାଦ ସାହୁ, ବିପିନ ସାହୁ, ରମାକାନ୍ତ ସାହୁ, ସୁଚିତ୍ରା ଓଝା, ଅମିନ ରାଉଳ ପ୍ରମୁଖ ସହଯୋଗ କରିଥିଲେ।
