ମାଲକାନଗିରି,୨୫।୨(ଡି.ଏନ୍.ଏ.)- ମାଲକାନଗିରି ଜିଲା ପୋଲିସ କାର୍ଯ୍ୟାଳୟଠାରେ ଦକ୍ଷିଣ ପଶ୍ଚିମାଞ୍ଚଳ ଡିଆଇଜି ସଫିନ୍ ଅହମ୍ମଦ କେଙ୍କ ନିକଟରେ ଆଜି ଜଣେ ଦୁର୍ଦ୍ଦାନ୍ତ ମାଓବାଦୀ ଆତ୍ମସମର୍ପଣ କରିଛନ୍ତି। ସେ ହେଲେ କମୁଳୁ ବେଟି। ଛତିଶଗଡ଼ ବିଜାପୁର ଜିଲା କମକା ଗ୍ରାମରେ ତାଙ୍କ ଘର ବୋଲି ଜଣାପଡ଼ିଛି। ସେ ୨୦୦୭ରେ ମାଓ ସଂଗଠନରେ ଯୋଗ ଦେଇଥିବା ବେଳେ ବର୍ତ୍ତମାନ ଦରଭା ଡିଭିଜନ ଅଧୀନ କାଙ୍ଗେରଘାଟି ଏରିଆ କମିଟିର ଏରିଆ କମିଟି ସମ୍ପାଦକ ଭାବେ କାର୍ଯ୍ୟ କରୁଥିଲେ। ସେ ମାଥିଲି ଥାନା ଅନ୍ତର୍ଗତ ଗୋଲିଆଗୁଡ଼ା ଗ୍ରାମର ବିଜୟ ମୁଚାକି ଓ ଧୁରୁଆ ମୁଚାକିଙ୍କୁ ନିସ୍ତୁକ ମାଡ ମାରିବା, ମାଥିଲି ଥାନାର ଖଟୁଆପଦର ଗ୍ରାମର ପରଦେଶି ଧୁରୁଆଙ୍କୁ ହତ୍ୟା, ଟେମୁରୁପାଲ୍ଲୀ ଗ୍ରାମ ନିକଟରେ ଜେସିବି ମେଶିନ ଓ ଟିପ୍ପର ପୋଡ଼ି ଓ ଚାଲାଣଗୁଡ଼ା ନିକଟରେ ପ୍ରବୋଧ ବିଷୋୟୀ ନାମକ ଠିକାଦାରଙ୍କୁ ହତ୍ୟା, କୁକୁରକୁଣ୍ଡ ଗ୍ରାମର ଗୁଜ କବାସୀଙ୍କୁ ହତ୍ୟା, ଦଣ୍ଡିପଦର ଗ୍ରାମର ବୁଦ୍ରା ମାଡ଼କାମି ଓ ସମାରୁ ମୁଚାକିଙ୍କୁ ହତ୍ୟା, ସୋଡ଼ିଗୁଡ଼ା ଗ୍ରାମ ନିକଟରେ ପୁଲସ ସହ ଗୁଳି ବିନିମୟ ଘଟଣା, ଡଲଡଲି ଗ୍ରାମ ନିକଟରେ ପୋଲିସ ସହ ଗୁଳି ବିିନିମୟ ଘଟଣା, ଟେମୁରୁପାଲ୍ଲୀ ପଞ୍ଚାୟତ କାର୍ଯ୍ୟାଳୟକୁ ଭାଙ୍ଗିବା ସହ ସରକାରୀ ସମ୍ପତ୍ତି ଲୁଟ ପ୍ରଭୃତି ବହୁ ହିଂସାକାଣ୍ଡରେ ଜଡ଼ିତ ଥିବା ଜଣାପଡ଼ିଛି। ତାଙ୍କ ନାମରେ ସରକାର ୫ ଲକ୍ଷ ଟଙ୍କା ପୁରସ୍କାର ରାଶି ଘୋଷଣା କରିଥିଲେ। ଏବେ କମୁଳୁଙ୍କୁ ସରକାରଙ୍କ ଆତ୍ମସମର୍ପଣ ଯୋଜନା ଅନୁଯାୟୀ ଆର୍ଥିକ ସାହାଯ୍ୟ ପ୍ରଦାନ କରାଯିବା ସହ ବାସଗୃହ ନିର୍ମାଣ ପାଇଁ ଆର୍ଥିକ ସହାୟତା, ପାଠପଢ଼ିବା ଏବଂ ଧନ୍ଦାମୂଳକ ତାଲିମ ପ୍ରଦାନ କରାଯିବ ବୋଲି ଡିଆଇଜି ଖବରଦାତା ସମ୍ମିଳନୀରେ ପ୍ରକାଶ କରିଛନ୍ତି ା ଖବରଦାତା ସମ୍ମିଳନୀରେ ମାଲକାନଗିରି ଆରକ୍ଷୀ ଅଧୀକ୍ଷକ ରିଷିକେଶ ଡି ଖିଲାରୀ ଓ ବିଏସ୍ଏଫ୍ କମାଣ୍ଡାଣ୍ଟ ଅମରେନ୍ଦ୍ର ସିଂ ଉପସ୍ଥିତ ଥିଲେ ା
