ଜହ୍ନାପଙ୍କ, ୧୨ା୮(ଡି.ଏନ୍.ଏ.): ବୌଦ୍ଧ ଜିଲା ସଦର ବ୍ଲକ ଲକ୍ଷ୍ମୀପ୍ରସାଦ ପଁଚେତ୍ ଅଧୀନ ନାରାୟଣ ନଗର। ଇ ଗଁାରେ ତିଆର ହେଉଥିବାର ଅଙ୍ଗନଓ୍ବାଡି କେନ୍ଦ-୨ ଅନେକ ଦିନ୍ ହେଲା ଦରଖଁଡ଼ିଆ ଅବସ୍ତାରେ ପଡ଼ିରହିଛେ। କେନ୍ଦ୍ରର ନିଜର ଘର ନାଇଁଥିଲାବେଲେ କରମୀ ଝନ୍କ ଗଁାର ମାଉସୀ ଗୁଡ଼ିନେ ଛୁଆକୁ ପାଠ୍ ପଢ଼ଉଥିଲେ। ଇ ବାବ୍ଦେ ଭିନେ ଭିନେ ଗଣମାଧ୍ୟମରେ ଖବର ବାହାରଲାରୁ ବ୍ଲକ ପରଶାସନ ଅଙ୍ଗନଓ୍ବାଡି କେନ୍ଦ୍ର ତିଆରି ଲାଗି ୫ ଲାଖ୍ ଟଁକା ଅନୁଦାନ ଦେଇଥିଲା। କାମ୍ଟା ବିଭାଗୀୟ କନିଷ୍ଠ ଯନ୍ତ୍ରୀକଁର ନଁାରେ ଥିଲାବେଲେ ପେଟି ଠିକାଦାର ଜରିଆରେ କାମ୍ କରାଯାଉଛେ। ଯେନ୍ଥିରଲାଗି କାମ୍ଟା ବହୁତ୍ ହଲ୍କା ହେଉଥିବାର ସାଧାରନରେ ଅଭିଯୋଗ ହେଉଛେ। ଇଆଡ଼େ ସରକାର ୩ରୁ ୬ ବଛର୍ର ଛୁଆକାର ପ୍ରାକ୍ ଶିକ୍ଷା ସଂଗେ ପୁଷ୍ଟିକର ଖାଏଦ୍, ଗରଭବତୀ, ପ୍ରସୂତୀ ମହିଲାମାନକୁ ଅଙ୍ଗନଓ୍ବାଡି କେନ୍ଦ୍ର ଜରିଆରେ ସେବା ଯୁଗେଇ ଦେଉଛନ୍। ଇଥିରଲାଗି ଫିବଛର ସରକାର କୋଟି କୋଟି ଟଁକା ଖରଚ୍ କରୁଛନ୍। ହେଲେ ଅନେକ ଜାଗାରେ କେନ୍ଦ୍ର ଅଭାବୁ ଛୁଆମାନେ କେନ୍ଠାନେ ଗଛ୍ତଲେ ପଢ଼ୁଛନ୍ ତ ଆରକେନ୍ନେ ଭଂଗା ଦଦ୍ରା ଘରେ ପଢ଼ୁଛନ୍। ସେନ୍ତା ଅନେକ ଜାଗାରେ ବିଭାଗୀୟ ଅଧ୍କାରୀମାନକର ଖାମଖିଆଲି ମନଭାବ ଲାଗି ସରକାରକଁର ଇ ମହତ୍ ଉଦେଶ ଫସର ଫାଟୁଛେ। ନାରାୟଣ ନଗରରେ ତିଆର ହେଉଥିବାର ଅଙ୍ଗନଓ୍ବାଡି କେନ୍ଦ୍ର-୨ ଏନ୍ତା ଘଟନାର ଗୁଟେ ଉଦାହରନ୍ ଆଏ। ଯେନ୍ଥିରଲାଗି ଇ କେନ୍ଦ୍ର ଅଧୀନ୍ରେ ଥିବାର ଛାତ୍ରୀଛାତ୍ର ଆଏଜ୍ ବି ବିପଦ୍ ଅବସ୍ତାରେ ପାଠ୍ପଢ଼ୁଛନ୍। ଯେତେ ଜଲ୍ଦି ହେବା ଇ କେନ୍ଦ୍ରର ତିଆରି କାମ୍ ସାରବାକେ ଗଁାବାସୀ ଦାବି କରିଛନ୍।
