ଲାଠୋର, ୨୩।୧ (ଡି.ଏନ୍.ଏ.)- ବଲାଙ୍ଗୀର ଜିଲା ଖପ୍ରାଖୋଲ ବ୍ଲକ ଅଧୀନ ମାଲପଡ଼ା ପଁଚେତ୍ ସଦରରେ ରହିଛେ ଅନୁସୂଚୀତ ଜାତି ଜନଜାତି ଉନ୍ନୟନ ବିଭାଗ ଦୁଆରା ପରିଚାଲିତ ଉଚ୍ଚ ମାଧ୍ୟମିକ ବିଦ୍ୟାଲୟ। ହେଲେ ସ୍କୁଲରେ ଡାଇନିଂ ହଲ୍ ତିଆରି କାମ୍ ଅନେକ ଦିନୁ ଦରଖଁଡ଼ିଆ ହେଇ ପଡ଼ିଛେ। ଏନ୍ତାଥି ସ୍କୁଲର ଶତାଧିକ୍ ଛାତ୍ରୀଛାତ୍ର ତଲେ ବସି ଖାଏଦ୍ ଖାଉଥିବାର ଅଭିଯୋଗ ହେଉଛେ।
ସୂଚନା ଅନ୍ସାରେ ୧୯୫୧ ସାଲେ ଅନୁସୂଚୀତ ଜାତି ଜନଜାତି ଉନ୍ନୟନ ବିଭାଗ ତରଫୁ ଅଂଚଲର ଆଦିବାସୀ ଛାତ୍ରୀଛାତ୍ରକଁର ପାଠ୍ପଢ଼ାର ସୁବିଧା ଲାଗି ମାଲପଡ଼ାରେ ଗୁଟେ ଆଶ୍ରମ ସ୍କୁଲର ଥାପନା କରାଯାଇଥିଲା। ଏହେଦେ ସ୍କୁଲରେ ୬ଷ୍ଠରୁ ଯୁକ୍ତ ଦୁଇ ବିଜ୍ଞାନ ଆର ବାଣିଜ୍ୟ ତକ୍ ପଢ଼ବାର ବେବସ୍ତା ରହିଛେ। ସେନ୍ତା ସ୍କୁଲରେ ମୋଟ ୭୫୦ ଛାତ୍ରୀଛାତ୍ର ରହି ପାଠ୍ପଢ଼ୁଛନ୍। ପାଠ୍ପଢ଼ାବାର ଲାଗି ଶିକ୍ଷୟିତ୍ରୀ ଶିକ୍ଷକ, ଅଧ୍ୟାପିକା ଅଧ୍ୟାପକ ରହିଥିଲେ ବି ୨୦୧୮ରୁ ପ୍ରଧାନଶିକ୍ଷକ ତଥା ଅଧ୍ୟକ୍ଷ ପଦବୀ ଖାଲି ପଡ଼ିଛେ। ଯାଜପୁରରୁ ବିଷ୍ଣୁଚରଣ ମହାନ୍ତି ଆର ବଲାଙ୍ଗୀରରୁ ଚନ୍ଦ୍ରକାନ୍ତି ମିଶ୍ରକୁଁ ମାଲପଡ଼ା ସ୍କୁଲକେ ବଦଲି ହେଇଥିଲେ ବି ସେମାନେ କାଯ୍ରେ ଯୋଗ ନାଇଁଦେଇ। ଏନ୍ତାଥି ସ୍କୁଲର ଝନେ ଟିଜିଟି ଶିକ୍ଷକ ଦାଇତିଅରେ ରହିଛନ୍। ସେନ୍ତା ଛାତ୍ରୀଛାତ୍ରକଁର ସୁବିଧା ଲାଗି ଆଏଜ୍କେ ୪ ବଛର ତଲେ ଲକ୍ଷାଧିକ୍ ଟଁକା ଖରଚ୍ ଅଟକଲରେ ଗୁଟେ ଡାଇନିଂ ହଲ୍ ତିଆରି କାମ୍ ମୂଲ ହେଇଥିଲା। ହେଲେ ସେଟା ଆଏଜ୍ତକ ଦରଖଁଡ଼ିଆ ହେଇ ପଡ଼ିଛେ। ଏନ୍ତାଥି ଛାତ୍ରୀଛାତ୍ର ଭିନେ ଭିନେ ଜାଗାରେ ବାହାରେ ବସି ଖାନାପିନା କରୁଛନ୍। ସ୍କୁଲର ଛାତ୍ରୀଛାତ୍ର ଅନେକ ଦିନ ହେଲା ଡାଇନିଂ ହଲ୍ ଲାଗି ଦାବି କରି ଆସୁଥିଲେ ବି କେହି ତାକର କଥା ନାଇଁ ଶୁନବାର ବଲି ଅଭିଯୋଗ କରିଛନ୍। ଇ ବାବ୍ଦେ ବଲାଙ୍ଗୀର ଡିଡବ୍ଲୁଓ ପରମାନନ୍ଦ ପୃଷ୍ଟିକୁଁ ପଚ୍ରାଲାରୁ ଆମେ ଡାଇନିଂ ହଲ୍ କାମ୍ ପୂରା କରବାକେ ଖପ୍ରାଖୋଲ ବିଡିଓକୁଁ ଚିଠି ଲେଖିଛୁଁ। କାମ୍ କେତେଦୂର ହେଇଛେ ସେଟାକେ ଦେଖି ପଦକ୍ଷେପ ନିଆଯିବା ବଲି ସେ କହିଥିଲେ। ହେଲେ ଛାତ୍ରୀଛାତ୍ରକଁର ସୁଆରଥ୍କେ ଦେଖି ସ୍କୁଲରେ ଝନେ ଥାଇ ପ୍ରଧାନଶିକ୍ଷକ ତଥା ଅଧ୍ୟକ୍ଷକୁଁ ନିଯୁକ୍ତି ଦେବାର ସଂଗେ ଡାଇନିଂ ହଲ ପୂରା କରବାକେ ସାଧାରନରେ ଦାବି ହେଉଛେ।
