ଜଗତ୍ସିଂହପୁର ଅଫିସ, ୧୧ା୧୨: ଜଗତ୍ସିଂହପୁର ଜିଲା କୁଜଙ୍ଗସ୍ଥିତ ଏକ ବିଦେଶୀ ମଦ ଦୋକାନରେ ପରିଚାଳକଭାବେ କାର୍ଯ୍ୟ କରୁଥିବା କୁଜଙ୍ଗ ଥାନା ଜଗନ୍ନାଥପୁର ଗ୍ରାମର ପ୍ରଶାନ୍ତ ନାରାୟଣ ଦାସ ଓରଫ ପସିଆ (୩୬)ଙ୍କୁ ୨୦୧୪ରେ ଗୁଳି କରି ହତ୍ୟା କରା ଯାଇଥିବା ଅଭିଯୋଗ ହୋଇଥିଲା। ଦାଦା ବଟିକୁ କେନ୍ଦ୍ରକରି ଏହି ଗୁଳିକାଣ୍ଡ ଘଟିଥିଲା। ମଙ୍ଗଳବାର ଏହି ମାମଲାର ରାୟ ପ୍ରକାଶ ପାଇଛି। କୁଜଙ୍ଗ ଅତିରିକ୍ତ ଜିଲା ଓ ଦୌରାଜଜ୍ ପ୍ରଣବ କୁମାର ରାଉତରାୟ ମାମଲାର ବିଚାର କରି ସମସ୍ତ ୬ ଅଭିଯୁକ୍ତଙ୍କୁ ଆଜୀବନ ଜେଲଦଣ୍ଡରେ ଦଣ୍ଡିତ କରିଛନ୍ତି। ସେମାନେ ହେଲେ କୁଜଙ୍ଗ ଥାନା କୋଠିଆସାହିର ମଣ୍ଟୁ ପାତ୍ର (୩୭), ଅପୁ ଓରଫ ଅଜିତ ଦାସ (୩୭), ଚଦିଆର ରିଙ୍କୁ ଓରଫ ଲିଙ୍କନ୍ ଓରଫ ଶୁଭ୍ରାଂଶୁ ଶେଖର ଶୁକ୍ଳା (୨୩), ଷଣ୍ଢକୁଦର ଟୁକୁନା ଓରଫ ଜିମୁତ ଦାସ (୫୨), କଟକ ଜିଲା ଗତିରାଉତପାଟଣାର ଦୋରା ଓରଫ ରଞ୍ଜିତ ରାଉତ(୩୫) ଓ ରାଜା ଓରଫ ରାଜେଶ ରାଉତ(୪୦)। ଏଥିସହ ପ୍ରତ୍ୟେକଙ୍କୁ ୨୦ ହଜାର ଟଙ୍କା ଲେଖାଏ ଜରିମାନା ଦେବାକୁ ନିର୍ଦ୍ଦେଶ ହୋଇଛି। ଏହି ରାଶି ଅନାଦାୟ ହେଲେ ପ୍ରତ୍ୟେକ ଅଧିକ ୧ ବର୍ଷ ଲେଖାଏ ଜେଲ ଦଣ୍ଡ ଭୋଗିବେ ବୋଲି ରାୟରେ ଉଲ୍ଲେଖ କରାଯାଇଛି।
ଏ ସମ୍ପର୍କରେ କୁଜଙ୍ଗ କୋର୍ଟ ଅତିରିକ୍ତ ପ୍ରବ୍ଲିକ ପ୍ରସିକ୍ୟୁଟର ଦେବାଶିଷ କଣ୍ଠ କହିଛନ୍ତି, ୧୧ା୭ା୧୪ ରାତି ପ୍ରାୟ ୯ଟା ବେଳେ ପସିଆ ତାଙ୍କ ବାଇକ୍ ଯୋଗେ ମଦ ଦୋକାନରୁ ଘରକୁ ଯାଉଥିଲେ। କିନ୍ତୁ କୌଣସି କାରଣବଶତଃ ସେ କୁଜଙ୍ଗ ବ୍ଲକ ପଡ଼ିଆ ପରିସରରେ ବାଇକ୍ ରଖି ଛିଡ଼ା ହୋଇଥିଲେ। ଏହି ସମୟରେ ଉପରୋକ୍ତ ଅଭିଯୁକ୍ତମାନେ ବାଇକ୍ ଯୋଗେ ଆସି ତାଙ୍କୁ ୨ ରାଉଣ୍ଡ ଗୁଳି କରିଥିଲେ। ଗୋଟିଏ ରାଉଣ୍ଡ ଗୁଳି ପସିଆଙ୍କ ମୁଣ୍ଡରେ ବାଜିଥିଲା। ଫଳରେ ସେଠାରେ ସେ ଟଳି ପଡ଼ିଥିଲେ। ଖବର ପାଇ ପରିବାର ସଦସ୍ୟ ଓ ଅନ୍ୟମାନେ ତାଙ୍କୁ ଉଦ୍ଧାର କରି କୁଜଙ୍ଗ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ। ସେଠାରେ ଡାକ୍ତର ମୃତ ଘୋଷଣା କରିଥିଲେ। ଏହିଦିନ ପସିଆଙ୍କ ଭାଇ ବିକ୍ରମ ନାରାୟଣ ଦାସ କୁଜଙ୍ଗ ଥାନାରେ ଅଭିଯୋଗ କରିଥିଲେ। ପୋଲିସ ଦଫା ୧୪୭/୧୪୮/୩୮୫/୧୪୯/୩୦୨/୧୪୯ ଆଇପିସି ଏବଂ ଦଫା ୨୫(ଆଇବି)(ଏ)/୨୭ ଆର୍ମସ୍ ଆକ୍ଟରେ ମାମଲା ସଂଖ୍ୟା ୧୭୭/୧୪ ରୁଜୁ କରି ତଦନ୍ତ କରିଥିଲା। ଉପରୋକ୍ତ ୬ ଅଭିଯୁକ୍ତ ଗିରଫ ହୋଇଥିବା ବେଳେ ରାଜେଶ ଏ ପର୍ଯ୍ୟନ୍ତ ଜେଲରେ ଅଛନ୍ତି। ଅନ୍ୟ ୫ ଅଭିଯୁକ୍ତ ଜାମିନରେ ଆସିଥିଲେ। ମାମଲାରେ ୧୦ ଜଣ ସାକ୍ଷୀଙ୍କ ବୟାନ ଓ ତଥ୍ୟ ପ୍ରମାଣକୁ ଭିତ୍ତିକରି ବିଚାରପତି ଦଫା ୩୦୨/୧୪୯ ଆଇପିସିରେ ସମସ୍ତ ୬ ଅଭିଯୁକ୍ତଙ୍କୁ ଆଜୀବନ କାରାଦଣ୍ଡାଦେଶ ଶୁଣାଇଛନ୍ତି। ଏହି ୬ ଅଭିଯୁକ୍ତଙ୍କ ନାମରେ ଜଗତ୍ସିଂହପୁର ଜିଲାର ବିଭିନ୍ନ ଥାନା ଅଞ୍ଚଳରେ ଆପରାଧିକ ମାମଲା ରହିଛି। ରାଜେଶ ଓ ରଞ୍ଜିତଙ୍କ ନାମରେ କେବଳ ଜିଲା ନୁହେଁ ବାହାରେ ଅର୍ଥାତ୍ ଅବିଭକ୍ତ କଟକ ଜିଲାରେ ଏକାଧିକ ମାମଲା ବିଚାରାଧୀନ ଅଛି। ରାୟ ପ୍ରକାଶ ପରେ ରାଜେଶଙ୍କୁ ଝାରପଡ଼ା ଜେଲ ଓ ଅନ୍ୟ ୫ ଜଣଙ୍କୁ କୁଜଙ୍ଗ ସମାଗୋଳ ଉପକାରାଗାର ପଠାଇ ଦିଆଯାଇଛି।
