ଦିଗପହଣ୍ଡି,୨୨ା୪(ଡି.ଏନ.ଏ.)- ଦିଗପହଣ୍ଡି ବ୍ଲକରେ ଗଞ୍ଜାମ ଜିଲା ପ୍ରଶାସନ ପକ୍ଷରୁ ଆରମ୍ଭ କରାଯାଇଥିବା ‘ମିଲ’ ଯୋଜନାର ଶୁଭାରମ୍ଭ ହୋଇଛି। ବିଡ଼ିଓ ହଳଧର ଶବର ନିମଖଣ୍ଡି ପେଣ୍ଠ ପଞ୍ଚାୟତ ପନାଡ଼ ଗାଁରେ ପହଞ୍ଚତ୍ ହିତାଧିକାରୀଙ୍କୁ ମିଲ୍ କିଟ ବଣ୍ଟନ କରି ଏହାର ଶୁଭାରମ୍ଭ କରିଥିଲେ। କରୋନା ମୁକାବିଲା ସମୟରେ କାମଧନ୍ଦା ଅଭାବରୁ ଗରିବ ଅସହାୟ ଦିନ ମଜୁରିଆଙ୍କ ଜୀବନ ଜୀବିକା ବିପନ୍ନ ହୋଇପଡିଛି। ସେମାନଙ୍କ ଖାଦ୍ୟ ସୁରକ୍ଷାକୁ ଦୃଷ୍ଟିରେ ରଖି ଗଞ୍ଜାମ ଜିଲା ପ୍ରଶାସନ ପକ୍ଷରୁ ଏକ ଅଭିନୟ ପ୍ରୟାସ କରାଯାଇଛି। ରାସନକାର୍ଡ ନଥିବା ଅସହାୟ ଗରିବଙ୍କ ପାଇଁ ଜିଲା ପ୍ରଶାସନ ପକ୍ଷରୁ ପକ୍ଷରୁ ଏଭଳି ପଦକ୍ଷେପ ନିଆଯାଇଥିବା ବିଡ଼ିଓ କହିଛନ୍ତି। ଏହି ଯୋଜନାରେ ଯେ କୌଣସି ସ୍ବେଚ୍ଛାସେବୀ ଅନୁଷ୍ଠାନ କିମ୍ବା କୌଣସି ସହୃଦୟ ବ୍ୟକ୍ତି ପ୍ରତି ଗରିବ ପରିବାରଙ୍କ ପାଇଁ ୫ କିଲୋ ଚାଉଳ, ୧ କିଲୋ ଡ଼ାଲି, ୧ ଲି. ଖାଇବା ତେଲ, ୧ କିଲୋ ଲୁଣ, ୧ କିଲୋ ସୋୟାବିନ ଓ ମସଲା ଦାନ ଆକାରରେ ଦେଇପାରିବେ। ଏଥିପାଇଁ ଗଞ୍ଜାମ ଜିଲା ଗ୍ରାମ୍ୟ ଉନ୍ନୟନ ସଂସ୍ଥା ପକ୍ଷରୁ ଏକ ସେଲ ଖୋଲାଯାଇଛି।
