ରାୟଗଡ଼ା ଅଫିସ, ୭।୧୧: ଦୁଇମାସର ଶିଶୁ କନ୍ୟାକୁ ଧରି ଜଣେ ମହିଳା ମାଓବାଦୀ ଗୁରୁବାର ରାୟଗଡ଼ା ଏସ୍ପିଙ୍କ ନିକଟରେ ଆତ୍ମସମର୍ପଣ କରିଛନ୍ତି। ତାଙ୍କ ନାମ ହେଲା ପାର୍ବତୀ ଓରଫ୍ ରିଙ୍କି(୨୭)। ଛତିଶଗଡ଼ର ବିଜାପୁର ଜିଲା ମାର୍ଥୁ ଥାନା ଅଧୀନ ଓ୍ବାଚମ ଗାଁରେ ତାଙ୍କ ଘର। ତାଙ୍କ ନାଁରେ ୧ଲକ୍ଷ ଟଙ୍କା ପୁରସ୍କାର ରାଶି ଘୋଷଣା କରାଯାଇଥିଲା।
ସୂଚନାଅନୁଯାୟୀ, ପାର୍ବତୀ ବାଂଶଧାର-ଘୁମୁସର ନାଗାବଳୀ ଡିଭିଜନର ଘୁମୁସର ଦଳମ୍ରେ ଆଠ ବର୍ଷ ଧରି କାମ କରୁଥିଲେ। ତାଙ୍କ ସ୍ବାମୀ ରାଜୁ ସିପିଆଇ ମାଓବାଦୀ ସଂଗଠନର କେନ୍ଦ୍ରୀୟ କମିଟି ସଦସ୍ୟ ଭାବେ କାମ କରୁଛନ୍ତି। ସଙ୍ଗଠନରେ ମହିଳାମାନଙ୍କୁ ହୀନଦୃଷ୍ଟିରେ ଦେଖାଯାଉଛି। ସେମାନଙ୍କୁ ଉପଯୁକ୍ତ ସମ୍ମାନ ମିଳୁନି। ଝିଅ ପୁଅଙ୍କ ଭିତରେ ଭେଦଭାବ କରାଯାଉଛି, ଝିଅଙ୍କୁ ନିଜ ମତ ରଖିବାକୁ ଦିଆଯାଉନାହିଁ, ଝିଅମାନଙ୍କ ପାଇଁ ସଙ୍ଗଠନ ପକ୍ଷରୁ କୌଣସି ସ୍ବତନ୍ତ୍ର ବ୍ୟବସ୍ଥା ନାହିଁ। ସେମାନଙ୍କୁ ସୁରକ୍ଷା ମଧ୍ୟ ଦିଆଯାଉନି। ସେ ଗର୍ଭବତୀ ଥିବାବେଳେ ସଙ୍ଗଠନ ତାଙ୍କୁ ଜଙ୍ଗଲରେ ଏକା ଛାଡି ଚାଲି ଯାଇଥିଲା। ମାଓବାଦୀଙ୍କ ଆଦର୍ଶ ମଧ୍ୟ ଆଗ ଭଳି ଆଉ ନାହିଁ। ଏ ସବୁରେ ଅତିଷ୍ଠ ହୋଇ ସଙ୍ଗଠନ ଛାଡିଛି ବୋଲି ପାର୍ବତୀ ପୋଲିସ ଆଗରେ କହିଛନ୍ତି। ଉଲ୍ଲେଖଯୋଗ୍ୟ, ପାର୍ବତୀ ରାୟଗଡ଼ା ଜିଲା କଡ୍ରାକାବାନ୍ଦିଲି ବିସ୍ଫୋରଣ, ଧାମନପଙ୍ଗ ବିସ୍ଫୋରଣ, ଡଙ୍ଗାମତି ବିସ୍ଫୋରଣ, ଜରପାରେ ଏସ୍ଓଜି ଟିମ୍ ଉପରେ ଆକ୍ରମଣ, ଡିଭିଏଫ ଯବାନଙ୍କ ମୃତ୍ୟୁ ଘଟଣା, କଳାହାଣ୍ଡି ଜିଲା ପାହାପଦର ଗ୍ରାମର ରାଜେନ୍ଦ୍ର ସାହୁଙ୍କୁ ହତ୍ୟା, ବାବୁପଦର ଗାଁର ଭୀମ ଦୋରାଙ୍କୁ ହତ୍ୟା, ବଣ୍ଡାକଲି ଗାଁରେ ପୋଲିସ ଏବଂ ମାଓବାଦୀଙ୍କ ମଧ୍ୟରେ ହୋଇଥିବା ଗୁଳି ବିନିମୟ ଘଟଣାରେ ସମ୍ପୃକ୍ତ ଥିବା ଏସ୍ପି ସର୍ବଣା ବିବେକ ଏମ୍ ସୂଚନା ଦେଇଛନ୍ତି।
