ଭଦ୍ରକ ଅଫିସ, ୨୮।୧୦ : ଭଦ୍ରକ ଜିଲାର ଦୁଇଟି ସ୍ଥାନରୁ ସୋମବାର ଲୁଟେରାମାନେ ୬ ଲକ୍ଷ ୪୦ ହଜାର ଟଙ୍କା ଲୁଟି ନେଇଛନ୍ତି। ଲୁଟ୍ର ତରିକା ଭିନ୍ନ କିନ୍ତୁ ଦୁହେଁ ବ୍ୟାଙ୍କରୁ ଟଙ୍କା ନେଇ ବାହାରି ଆସିବା ସମୟରେ ଲୁଟ୍ର ଶିକାର ହୋଇଥିବା ଜଣାପଡ଼ିଛି। ସୂଚନା ଅନୁଯାୟୀ, ତିହିଡ଼ି ତଳଗୋପବିନ୍ଧା ଗ୍ରାମର ମଦନ କୁମାର ନାୟକ ଅପର୍ତ୍ତିବିନ୍ଧା ଷ୍ଟେଟବ୍ୟାଙ୍କରୁ ୧ ଲକ୍ଷ ୪୦ ହଜାର ଟଙ୍କା ଉଠାଇ ବାଇକ୍କୁ ବନ୍ତ ଛକ ବସ୍ଷ୍ଟାଣ୍ଡ ନିକଟ ଫିସେରୀ ଅଫିସ୍ ସମ୍ମୁଖରେ ରଖି ମାର୍କେଟିଂ କରୁଥିଲେ। ଏହି ସମୟରେ କେହି ଲୁଟେରା ବାଇକ୍ ଡିକି ଚାବି ଖୋଲି ଉକ୍ତ ଟଙ୍କା ଲୁଟି ନେଇଥିବା ଟାଉନ ଥାନାରେ ଅଭିଯୋଗ ହୋଇଛି। ଟାଉନ ଥାନାଧିକାରୀ ସରୋଜିନୀ ସିଂ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲେ ମଧ୍ୟ ଲୁଟେରାଙ୍କ ସନ୍ଧାନ ମିଳି ନାହିଁ। ସେହିଭଳି ଗ୍ରାମାଞ୍ଚଳ ଥାନା ଅଧୀନ ରାହାଞ୍ଜ ନିକଟରୁ ବାଲିଖଣ୍ଡ ଅଞ୍ଚଳର ଜଣେ ଯୁବକ ଏକ ବ୍ୟାଙ୍କରୁ ୫ ଲକ୍ଷ ଟଙ୍କା ଉଠାଇ ଘରକୁ ଫେରୁଥିଲେ। ଦୁଇଜଣ ଲୁଟେରା ତାଙ୍କ ପିଛା କରି ସେ ଧରିଥିବା ଟଙ୍କା ବ୍ୟାଗ୍କୁ ଝାମ୍ପି ନେଇ ପଳାଇ ଯାଇଥିଲେ। ଗ୍ରାମାଞ୍ଚଳ ଥାନାଧିକାରୀ ପ୍ରଭାଂଶୁ ମିଶ୍ର ଘଟଣାସ୍ଥଳରେ ପହଞ୍ଚି ଅନୁଧ୍ୟାନ କରିବା ସହ ବ୍ୟାଙ୍କର ସିସିଟିଭି ଫୁଟେଜ୍ ଆଧାରରେ ତଦନ୍ତ ଚଳାଇଛନ୍ତି। ଏବେ ଭଦ୍ରକରେ ପୂଜା ବଜାର ହୋଇଥିବାରୁ ଲୁଟେରାମାନେ ସକ୍ରିୟ ହୋଇ ଉଠିଛନ୍ତି।
