ବୈଶିଙ୍ଗା, ୧୦ା୩(ଡି.ଏନ.ଏ.)-ବାଲେଶ୍ୱର ଓ ମୟୂରଭଞ୍ଜ ଜିଲାର ସୀମାନ୍ତ ଅଞ୍ଚଳର ଏକ ବିରାଟ ପଡ଼ିଆରେ ଗତ ଦୁଇ ଶହ ବର୍ଷ ଧରି ଆୟୋଜିତ ହୋଇଆସୁଛି ପିଞ୍ଛାବଣିଆ ମେଳା। ଗ୍ରାମର ଆରାଧ୍ୟ ଦେବତା ଶ୍ରୀ ରାଧାକୃଷ୍ଣଙ୍କ ବିଗ୍ରହମାନଙ୍କୁ ନାମ ସଂକୀର୍ତ୍ତନ ଦ୍ବାରା ପରିକ୍ରମା କରାଇ ମେଳା ପଡ଼ିଆରେ ଥିବା ଏକ ସୁଦୃଶ୍ୟ ମନ୍ଦିରରେ ସ୍ଥାପନ କଲାପରେ ପୂଜାର୍ଚ୍ଚନା କରାଯାଏ। ନିକଟବର୍ତ୍ତୀ ଗ୍ରାମରୁ ମଧ୍ୟ ୮ରୁ ୧୯ଟି ବିମାନରେ ରାଧାକୃଷ୍ଣଙ୍କର ବିଗ୍ରହ ପଟୁଆରରେ ଆସି ଏଠାରେ ମେଳଣ ହୋଇଥାଏ। ମନୋରଞ୍ଜନ ନିମନ୍ତେ ମୀନାବଜାର, ଦୋଳି, ଚକ୍ରି, ଯାଦୁଖେଳ ସହିତ ସ୍ଥାନୀୟ ପୁରୁଣିଆ ପଞ୍ଚାୟତର ପୁରୁଣିଆ ଗ୍ରାମ ଓ ନୂଆଗାଁ ଗ୍ରାମ କଳାକାରଙ୍କ ଦ୍ବାରା ସଙ୍ଗୀତ ଓ ନୃତ୍ୟ ପ୍ରତିଯୋଗିତା ଆୟୋଜନ ହୋଇଛି। ଏହି ମେଳା ପଡ଼ିଆର ଏକ ତୃତୀୟାଂଶ ଭାଗ ବାଲେଶ୍ୱର ଜିଲାର ରୂପସା ଥାନା ଅନ୍ତର୍ଗତ ହସନପୁର ପଞ୍ଚାୟତ ଅଧିନରେ ଆସୁଥିବା ବେଳେ ଅବଶିଷ୍ଟ ଅଂଶ ମୟୂରଭଞ୍ଜ ଜିଲାର ବୈଶିଙ୍ଗା ଥାନା ଅନ୍ତର୍ଗତ ପୁରୁଣିଆ ପଞ୍ଚାୟତ ଅଧୀନରେ ରହିଛି। ଉଭୟ ପଞ୍ଚାୟତ ପକ୍ଷରୁ ନିଜ ନିଜ ଅଂଶକୁ ନିଲାମ କରାଯାଇଥାଏ। ତେବେ ଲକ୍ଷାଧିକ ଜନସମାଗମ ହେଉଥିବା ସ୍ଥଳେ ଶୌଚାଳୟ କିମ୍ବା ପାନୀୟଜଳ ବନ୍ଦୋବସ୍ତ କରାଯାଇ ନାହିଁ। ଟ୍ୟାଙ୍କର ଯୋଗେ ପାଣି ଯୋଗାଇ ଦିଆଯାଉଥିଲେ ମଧ୍ୟ ତାହା ଆବଶ୍ୟକତା ପୂରଣ କରିବାରେ ବିଫଳ ହୋଇଛି। ବୈଶିଙ୍ଗା ଥାନା ପକ୍ଷରୁ ଏକ ପ୍ଲାଟୁନ ପୋଲିସ ଫୋର୍ସ ମୁତୟନ କରାଯାଇଛି।
