ଜଗତ୍ସିଂହପୁର ଅଫିସ୍, ୧୯ା୨: ଜଗତ୍ସିଂହପୁର ସହରରୁ ମଙ୍ଗଳବାର ପୂର୍ବାହ୍ନରେ ଲୁଟ୍ ହୋଇଛି। ବିରିଡ଼ି ଥାନା ଅନ୍ତର୍ଗତ ଅଣଖିଆର ସତ୍ୟବ୍ରତ ବିଶ୍ୱାଳ ନାମକ ବ୍ୟକ୍ତିଙ୍କଠାରୁ ୨ ଲକ୍ଷ ଟଙ୍କା ଦୁର୍ବୃତ୍ତ ଲୁଟ୍ କରିଛନ୍ତି। ବିଶ୍ୱାଳ ସ୍ଥାନୀୟ ଏକ ବ୍ୟାଙ୍କରୁ ୨ ଲକ୍ଷ ଟଙ୍କା ଉଠାଇ ବାଇକ୍ ଯୋଗେ ଗାଁକୁ ଫେରୁଥିବାବେଳେ କଲେଜ ଛକ ନିକଟରେ ଦୁର୍ବୃତ୍ତ ତାଙ୍କୁ ଅଟକାଇ ଟଙ୍କା ଛଡାଇ ନେଇଥିଲେ। ବିଶ୍ୱାଳଙ୍କ ଅଭିଯୋଗକ୍ରମେ ଜଗତ୍ସିଂହପୁର ପୋଲିସ ଦଫା ୩୯୨/୩୪ରେ ମାମଲା ସଂଖ୍ୟା ୫୮/୨୦ ରୁଜୁ କରି ତଦନ୍ତ ଜାରି ରଖିଛି। ବିଶ୍ୱାଳ ଥାନାରେ କରିଥିବା ଅଭିଯୋଗ ଅନୁଯାୟୀ, ପୂର୍ବାହ୍ନ ପ୍ରାୟ ୧୧ଟା ବେଳେ ସେ ୟୁବିଆଇ (ୟୁନାଇଟେଡ୍ ବ୍ୟାଙ୍କ ଅଫ ଇଣ୍ଡିଆ) ଜଗତ୍ସିଂହପୁର ଶାଖାରେ ପହଞ୍ଚତ୍ ଚେକ୍ ମାଧ୍ୟମରେ ଟଙ୍କା ଉଠାଇଥିଲେ। ଏହି ସମୟରେ ସାଥିରେ ଥିଲେ ସାଙ୍ଗ ସୁଦୀପ ସିଂ। ଟଙ୍କା ଉଠାଇ ସାରି ଦୁହେଁ ଏକ ବାଇକ୍ରେ ଅଣଖିଆ ଫେରୁଥିଲେ। ସିଂ ବାଇକ୍ ଚଳାଉଥବାବେଳେ ସେ ଟଙ୍କା ଧରି ପଛରେ ବସିଥିଲେ। କଲେଜ ଛକସ୍ଥିତ ଏକ କ୍ୟାଣ୍ଟିନର କିଛି ଆଗକୁ ଗଲାପରେ ହଠାତ୍ ଏକ ବାଇକ୍ରେ ୨ଜଣ ଯୁବକ ଆସି ଅଟକାଇଥିଲେ। ସେମାନଙ୍କ ମଧ୍ୟରୁ ଯିଏ ଗାଡି ଚଳାଉଥିଲେ ସେ ଚଷମା ସାଙ୍ଗକୁ ହେଲମେଟ୍ ପିନ୍ଧିଥିଲେ। ତାଙ୍କ ପଛରେ ବସିଥିବା ଅଭିଯୁକ୍ତଙ୍କ ରଙ୍ଗ କଳା। ତେବେ ସେମାନଙ୍କୁ ଏହି ବ୍ୟକ୍ତିଦ୍ୱୟ କାହିଁକି ଅଟକାଇଲେ ତାହା ବୁଝିବା ପୂର୍ବରୁ ବାଇକ୍ ପଛରେ ବସିଥିବା ଅଭିଯୁକ୍ତ ହଠାତ୍ ପାଖକୁ ଚାଲିଯାଇ ୨ ଲକ୍ଷ ଟଙ୍କା ଥିବା ଜରି ବ୍ୟାଗଟିକୁ ବଳପୂର୍ବକ ଛଡାଇ ନେଇଥିଲେ। ପରେ କାଳ ବିଳମ୍ବ ନ କରି ଯୁବକ ଦ୍ୱୟ ଜଗତ୍ସିଂହପୁର ଆଡକୁ ପଳାଇ ଯାଇଥିଲେ।
