ନୟାଗଡ଼ ଅଫିସ,୩।୧୧-ନୟାଗଡ଼ ଜିଲା ଶରଣକୁଳ ଲଡୁକେଶ ଆଥ୍ଲେଟିକ ଆସୋସିଏଶନ ପକ୍ଷରୁ ନାରାୟଣ ଉଚ୍ଚ ବିଦ୍ୟାଳୟ ଖେଳପଡ଼ିଆରେ ୬୦ତମ ସର୍ବଭାରତୀୟ ଫୁଟବଲ୍ ଟୁର୍ନାମେଣ୍ଟ ଚାଲୁ ରହିଛି। ଦ୍ୱିତୀୟ ଦିନରେ ସ୍ପୋଟର୍ସ ହଷ୍ଟେଲ ସମ୍ବଲପୁର ଓ ଧାନବାଦ୍ ଫୁଟବଲ୍ ଆସୋସିଏଶନ ଝାଡ଼ଖଣ୍ଡ ମଧ୍ୟରେ ଖେଳ ଅନୁଷ୍ଠିତ ହୋଇଥିଲା। ଖେଳର ପ୍ରଥମାର୍ଦ୍ଧ ବେଶ ସଂଘର୍ଷପୂର୍ଣ୍ଣ ଥିବାବେଳେ ୫ ମିନିଟରେ ସମ୍ବଲପୁର ଦଳର ୩ ନମ୍ବର ଖେଳାଳି ଶ୍ରୀକାନ୍ତ ଭୋଇ ବିପକ୍ଷ ଦଳକୁ ଏକ ଗୋଲ୍ ସ୍କୋର ଦେଇଥିଲେ। ଏହା ପରେ ଝାଡ଼ଖଣ୍ଡ ଦଳର ୧୬ ନମ୍ବର ଖେଳାଳି ସୁଶୀଲ ସିଂହ ବିପକ୍ଷ ଦଳକୁ ଗୋଲ୍ ସ୍କୋର ଦେଇ ସ୍ଥିତି ବରାବର ରଖିଥିଲେ। ଏହାପରେ ଖେଳର ଦ୍ୱିତୀୟାର୍ଦ୍ଧର ୧୭ ମିନିଟରେ ଝାଡ଼ଖଣ୍ଡ ଦଳର ୧୫ ନମ୍ବର ଖେଳାଳି ସଞ୍ଜୟ କୁମାର ବିପକ୍ଷ ଦଳକୁ ଏକ ଗୋଲ ସ୍କୋର ଦେଇଥିବା ବେଳେ ୩୦ ମିନିଟରେ ସମ୍ବଲପୁର ଦଳର ୩ ନମ୍ବର ଖେଳାଳି ଶ୍ରୀକାନ୍ତ ବିପକ୍ଷ ଦଳକୁ ଏକ ଗୋଲ୍ ସ୍କୋର ଦେଇଥିଲେ। ଖେଳ ଶେଷ ପର୍ଯ୍ୟନ୍ତ ଉଭୟ ଦଳ ୨-୨ ଗୋଲ୍ ସ୍କୋର ଦେଇଥିବାରୁ ଖେଳ ଅମୀମାଂସିତ ରହିଥିଲା। ଏହା ପରେ ଟାଇବ୍ରେକରର ସହାୟତା ନିଆଯାଇଥିଲା। ଏଥିରେ ଝାଡ଼ଖଣ୍ଡ ଦଳ ବିଜୟୀ ହୋଇଥିଲା। ଶନିବାର ଖେଳରେ ସୁବାସ ଚନ୍ଦ୍ର ପଣ୍ଡା, କୃଷ୍ଣଚନ୍ଦ୍ର ମହାରଣା, କୃଷ୍ଣଚନ୍ଦ୍ର ତ୍ରିପାଠୀ, ମନୋରଞ୍ଜନ ମହାପାତ୍ର, ଶିବପ୍ରସାଦ ପୁଷ୍ପପାଳକ ଅତିଥିଭାବେ ଯୋଗ ଦେଇଥିଲେ। ଶିବପ୍ରସାଦ ଦାସ ଖେଳ ପରିଚାଳନା କରିଥିବା ବେଳେ ରାଜୁ ମହାନ୍ତି , ଦିବ୍ୟରଞ୍ଜନ ଦାସ, ଲକ୍ଷ୍ମୀପ୍ରସାଦ ଲାଇନ୍ରେ ସହାୟତା କରିଥିଲେ। ଝାଡ଼ଖଣ୍ଡ ଦଳର ଖେଳାଳି ଶ୍ରୀକାନ୍ତ ଭୋଇଙ୍କୁ ଶନିବାର ଶ୍ରେଷ୍ଠ ଖେଳାଳି ଭାବେ ପୁରସ୍କୃତ କରାଯାଇଥିଲା। ରବିବାର ସଂଘର୍ଷ କ୍ଲବ ଭୁବନେଶ୍ୱର ସହିତ ସାଇ ହଷ୍ଟେଲ କଟକ ମଧ୍ୟରେ ମ୍ୟାଚ ଅନୁଷ୍ଠିତ ହେବ ବୋଲି ଆସୋସିଏଶନର ସଭାପତି ସତ୍ୟ ନାରାୟଣ ପ୍ରଧାନ ସୂଚନା ଦେଇଛନ୍ତି।
