ନୂଆଦିଲ୍ଲୀ, ୩୦ା୫ (ପି.ଟି.):ଗତବର୍ଷ ଟାଟା ଷ୍ଟିଲ୍ କୋଲକାତା ୨୫କେ ରେସ୍ରେ ଭାରତୀୟଙ୍କ ମଧ୍ୟରେ ପ୍ରଥମ ହୋଇଥିବା ଲଙ୍ଗ୍ ଡିଷ୍ଟାନ୍ସ ଧାବିକା କିରଣଜିତ୍ କୌରଙ୍କୁ ଓ୍ବାଲର୍ଡ ଆଥଲେଟିକ୍ସ ୪ବର୍ଷ ବାସନ୍ଦ କରିଛି। ଦୋହାଠାରେ ହୋଇଥିବା ଡୋପ୍ ଟେଷ୍ଟରେ ସେ ଧରାପଡ଼ିଥିଲେ। ନ୍ୟାଶନାଲ ଆଣ୍ଟି ଡୋପ୍ ଟେଷ୍ଟିଂ ଲାବୋରେଟୋରିକୁ ସସ୍ପେଣ୍ଡ ସସ୍ପେଣ୍ଡ କରାଯାଇଥିବାରୁ କୌରଙ୍କର ଦୋହାସ୍ଥିତ ସାମ୍ପଲ ଓ୍ବାଲର୍ଡ ଆଣ୍ଟି ଡୋପିଂ ଏଜେନ୍ସି (ଓ୍ବାଡା) ସ୍ବୀକୃତିପ୍ରାପ୍ତ ଲାବୋରେଟୋରିରେ ସାମ୍ପଲ ଟେଷ୍ଟ ହୋଇଥିଲା। ୩୨ ବର୍ଷୀୟ କୌର ଟାଟା ଷ୍ଟିଲ୍ କୋଲକାତା ୨୫କେ’ରେ ଯେଉଁ ପୁରସ୍କାର ଜିତିଥିଲେ ତାହା ପ୍ରତ୍ୟାହାର କରି ନିଆଯିବ। ଡିସେମ୍ବର ୧୫ରେ ପ୍ରତିଯୋଗିତା ବେଳେ ତାଙ୍କଠାରୁ ସାମ୍ପଲ ସଂଗ୍ରହ କରାଯାଇଥିବାରୁ ସେହି ଦିନଠାରୁ ବାସନ୍ଦ ଦଣ୍ଡ ଲାଗୁ ହୋଇଛି। ଓ୍ବାଲର୍ଡ ଆଥଲେଟିକ୍ସ କିନ୍ତୁ ଫେବୃୟାରୀ ୨୬ରୁ ଏହି ଆଥଲେଟଙ୍କୁ ସାମୟିକ ବାସନ୍ଦ କରିସାରିଥିଲା। କୌର ୨୦୧୯ ଡିସେମ୍ବର ୧୫ରୁ ୨୦୨୦ ଫେବୃୟାରୀ ୨୬ ମଧ୍ୟରେ ଭାଗ ନେଇଥିବା ସମସ୍ତ ପ୍ରତିଯୋଗିତା ପାଇଁ ଅଯୋଗ୍ୟ ଘୋଷିତ ହୋଇଛନ୍ତି। ଏହି ସମୟ ମଧ୍ୟରେ ସେ ଯଦି କୌଣସି ପୁରସ୍କାର, ଟାଇଟଲ, ପଦକ ଅବା ପଏଣ୍ଟ ହାସଲ କରିଥାନ୍ତି ତାହା ରଦ୍ଦ ହୋଇଯିବ। ଗତବର୍ଷ ଡିସେମ୍ବର ୧୫ରେ ଅନୁଷ୍ଠିତ କୋଲକାତା ୨୫କେ’ରେ କୌର ୧:୩୮:୫୬ ଟାଇମିଂରେ ଓଭରାଲ ୧୧ତମ ସ୍ଥାନରେ ରହିଥିଲେ ହେଁ ଭାରତୀୟଙ୍କ ମଧ୍ୟରେ ପ୍ରଥମ ସ୍ଥାନ ଅଧିକାର କରିଥିଲେ। ଗତବର୍ଷ ମାର୍ଚ୍ଚରେ ଫେଡେରେଶନ କପ୍ ନ୍ୟାଶନାଲ ଚାମ୍ପିୟନଶିପ୍ ପଟିଆଲାରେ ଅନୁଷ୍ଠିତ ହୋଇଥିଲା। ଏଥିରେ ସେ ୧୦,୦୦୦ ମିଟରରେ ଏକ ବ୍ରୋଞ୍ଜ ପଦକ ଲାଭ କରିଥିଲେ। ପ୍ରକୃତରେ ସେ ୩୫:୪୯.୯୬ ଟାଇମିଂରେ ଏହି ରେସ୍ରେ ଚତୁର୍ଥ ସ୍ଥାନ ଅଧିକାର କରିଥିଲେ। ମାତ୍ର ଡୋପିଂ ଅପରାଧ ପାଇଁ ସଞ୍ଜିବନୀ ଯାଦବଙ୍କଠାରୁ ସ୍ବର୍ଣ୍ଣ ପଦକ ପ୍ରତ୍ୟାହାର କରି ନିଆଯିବାରୁ କୌରଙ୍କୁ ବ୍ରୋଞ୍ଜ ମିଳିଥିଲା।
