ଲକ୍ଷ୍ନୌ,୩୦।୭: ଉନ୍ନାଓ ବଳାତ୍କାର ପୀଡିତାଙ୍କ ଦୁର୍ଘଟଣାକୁ ନେଇ ବେଳକୁ ବେଳ ପରିସ୍ଥିତି ଜଟିଳ ହେବାରେ ଲାଗିଛି। ଏହି ମାମଲାରେ ସୋମବାର ଭାଜପା ବିଧାୟକ କୁଲଦୀପ ସିଂ ସେନ୍ଗାରଙ୍କ ନାଁରେ ହତ୍ୟା ମାମଲା ରୁଜୁ ହୋଇଥିବା ବେଳେ ମଙ୍ଗଳବାର ପୀଡିତାଙ୍କ ପରିବାର ସଦସ୍ୟ କିଙ୍ଗ ଜର୍ଜସ୍ ମେଡିକାଲ ୟୁନିର୍ଭସିଟିର ଟ୍ରମା ସେଣ୍ଟର ନିକଟରେ ଧାରଣାରେ ବସିଛନ୍ତି। ଏମାନଙ୍କର ଦାବି ହେଉଛି ତୁରନ୍ତ ଅଭିଯୁକ୍ତ କୁଲଦୀପ ସିଂ ସେନ୍ଗାରଙ୍କୁ ଦଣ୍ଡ ଦିଆଯାଉ ଓ ଜେଲ୍ରେ ଥିବା ତାଙ୍କ ଦାଦା ମହେଶ ସିଂଙ୍କୁ ଛାଡି ଦିଆଯାଉ । ସୂଚନାଯୋଗ୍ୟ, ରବିବାର ସଡ଼କ ଦୁର୍ଘଟଣାରେ ଉନ୍ନାଓ ପୀଡ଼ିତା ଓ ତାଙ୍କ ଓକିଲ ଗୁରୁତର ଆହତ ହୋଇଥିବାବେଳେ ତାଙ୍କର ଖୁଡୀ ଓ ମାଉସୀ ପ୍ରାଣ ହରାଇଥିଲେ। ଏହି ଘଟଣାରେ ସୋମବାର ଭାଜପା ବିଧାୟକ କୁଲଦୀପ ସିଂ ସେନ୍ଗାରଙ୍କ ସମେତ ୧୦ ଜଣଙ୍କ ବିରୋଧରେ ହତ୍ୟା ମାମଲା ରୁଜୁ ହୋଇଛି। ରାଏବରେଲିର ଗୁରୁବକ୍ସଗଞ୍ଜ ଥାନାରେ ଦାଏର ଏତଲାରେ ୧୫ରୁ ୨୦ ଜଣ ଅଜଣା ବ୍ୟକ୍ତିଙ୍କ ନାଁ ରହିଛି। ଉତ୍ତରପ୍ରଦେଶର ବଙ୍ଗେରମାଉ ଆସନରୁ ୪ ଥର ବିଧାୟକ ଥିବା କୁଲଦୀପ ୨୦୧୭ରେ ଉନ୍ନାଓର ନାବାଳିକାଙ୍କୁ ବଳାତ୍କାର କରିବା ଅଭିଯାଗରେ ୨୦୧୮ରେ ଗିରଫ ହୋଇଥିଲେ। ରାଏବରେଲି ଜେଲ୍ରେ ଥିବା ପୀଡ଼ିତାଙ୍କ ଦାଦାଙ୍କ ଏତଲା କ୍ରମେ ମାମଲା ଦାଏର ହୋଇଥିଲା। ରବିବାର ପୀଡ଼ିତା ତାଙ୍କ ପରିବାର ସଦସ୍ୟ ଓ ଓକିଲଙ୍କ ସହ ଏକ କାରରେ ଯାଉଥିବାବେଳେ ଦ୍ରୁତଗାମୀ ଟ୍ରକ ଧକ୍କାଦେବାରୁ ଦୁଇ ପରିବାର ସଦସ୍ୟଙ୍କ ମୃତ୍ୟୁ ହେବା ସହ ପୀଡ଼ିତା ଓ ତାଙ୍କ ଓକିଲ ଗୁରୁତର ଆହତ ହୋଇଥିଲେ।
