ନୂଆଦିଲ୍ଲୀ, ୨୩।୬- ମହେନ୍ଦ୍ର ସିଂ ଧୋନୀଙ୍କୁ ଭାରତୀୟ କ୍ରିକେଟ୍ର ସବୁଠାରୁ ସଫଳ ଅଧିନାୟକ ବିବେଚିତ କରାଯାଏ। କ୍ରିକେଟ୍ ଇତିହାସର ପ୍ରଥମ ଅଧିନାୟକ ଭାବେ ଧୋନୀ ଅନ୍ତର୍ଜାତୀୟ କ୍ରିକେଟ୍ ପରିଷଦ (ଆଇସିସି)ର ୩ଟି ମେଜର ଟ୍ରଫି ଜିତିବାର କିର୍ତ୍ତୀମାନ ସ୍ଥାପନ କରିଥିଲେ। ଅଧିନାୟକ ଭାବେ ସେ ୨୦୦୭ରେ ପ୍ରଥମ ଆଇସିସି ଟ୍ରଫି ଜିତିଥିଲେ। ଏହି ବର୍ଷ ଖେଳାଯାଇଥିବା ଆଇସିସି ଟି୨୦ ବିଶ୍ୱକପ୍ର ପ୍ରଥମ ସଂସ୍କରଣରେ ଭାରତକୁ ଚାମ୍ପିୟନ କରାଇବାରେ ଧୋନୀଙ୍କ ନେତୃତ୍ୱଶୈଳୀକୁ ବେଶ୍ ପ୍ରଶଂସା କରାଯାଇଥିଲା। ସେହିଭଳି ଧୋନୀଙ୍କ ନେତୃତ୍ୱରେ ୨୦୧୧ରେ ଘରୋଇ ମାଟିରେ ଅନୁଷ୍ଠିତ ଆଇସିସି ଦିନିକିଆ ବିଶ୍ୱକପ୍ରେ ଭାରତ ଚାମ୍ପିୟନ ହୋଇଥିଲା। ତେବେ ଠିକ୍ ୭ ବର୍ଷ ତଳେ ଅର୍ଥାତ୍ ୨୦୧୩ ଜୁନ୍ ୨୩ରେ ଅନୁଷ୍ଠିତ ଆଇସିସି ଚାମ୍ପିୟନ୍ସ ଟ୍ରଫି ଫାଇନାଲ ମ୍ୟାଚ୍ ତାଙ୍କ ପାଇଁ ବେଶ୍ ଗୁରୁତ୍ୱ ବହନ କରେ। ଏହି ଦିନ ଇଂଲଣ୍ଡକୁ ହରାଇ ଧୋନୀ ଭାରତକୁ ୨ୟ ଥର ଲାଗି ଆଇସିସି ଚାମ୍ପିୟନ୍ସ ଟ୍ରଫି ଭେଟି ଦେଇଥିଲେ। ଏଥିସହ ବିଶ୍ୱର ପ୍ରଥମ ଅଧିନାୟକ ଭାବେ ଆଇସିସିର ୩ଟି ମେଜର ଟ୍ରଫି ଜିତିବାର ସୌଭାଗ୍ୟ ଲାଭ କରିଥିଲେ।
