ତେଲକୋଇ,୨୪।୫(ଡି.ଏନ.ଏ.): କେନ୍ଦୁଝର ଜିଲା ତେଲକୋଇ ଅଞ୍ଚଳ ଦେଇ ପ୍ରବାହିତ ସାମାକୋଇ ନଦୀ ଗଣ୍ଡରୁ ଗଣେଶ୍ୱର ଧୀବର (୬୩) ନାମକ ଜଣେ ବ୍ୟକ୍ତିଙ୍କର ମୃତଦେହକୁ ପୋଲିସ ଗୁରୁବାର ଉଦ୍ଧାର କରିଛି। ସେ ବୁଧବାର ନଦୀ ପାର ହୋଇ ଘରକୁ ଫେରୁଥିବା ବେଳେ ଗଣ୍ଡରେ ଗୋଡ ଖସିଯିବାରୁ ପାଣିରେ ବୁଡିଯାଇ ପ୍ରାଣ ହରାଇଥିବା ଅନୁମାନ କରାଯାଉଛି। ତେଲକୋଇ ଥାନା ପୋଲିସ ମୃତଦେହକୁ ସ୍ଥାନୀୟ ଡାକ୍ତରଖାନାରେ ବ୍ୟବଚ୍ଛେଦ କରାଇ ତଦନ୍ତ କରୁଛି। ଏ ନେଇ ଥାନାରେ ଏକ ଅପମୃତ୍ୟୁ ମାମଲା ରୁଜୁ ହୋଇଛି।
ପୋଲିସ ସୂଚନା ଅନୁଯାୟୀ ତେଲକୋଇ ଥାନା ଦନ୍ଦୁଆମୁଣ୍ଡା ଗ୍ରାମର ଗଣେଶ୍ୱର ସ୍ତ୍ରୀ ଗୋଲାପଙ୍କ ସହ ବୁଧବାର ଜଙ୍ଗଲରୁ ସରଗିଫୁଲ ଓ ଶାଳମଞ୍ଜି ସଂଗ୍ରହ ପାଇଁ ଯାଇଥିଲେ। ଗଣେଶ୍ୱର ସରଗି ଫୁଲ ଓ ଶାଳମଞ୍ଜି ସଂଗ୍ରହ କରି ଗୋଲାପଙ୍କ ହାତରେ ଘରକୁ ପଠାଇ ଦେଇଥିଲେ। ସେ ନିଜେ ଜାଳେଣି କାଠ ଧରିି ଘରକୁ ଫେରିବେ ବୋଲି କହିଥିଲେ। ଶାଳମଞ୍ଜି ଓ ଫୁଲ ଧରି ଗୋଲାପ ଘରକୁ ଫେରିବାର ଦୀର୍ଘ ସମୟ ଯାଏ ଗଣେଶ୍ୱର ନ ଫେରିବାରୁ ଖୋଜାଖୋଜି କରିଥିଲେ। ବୁଧବାର ରାତି ସୁଦ୍ଧା ତାଙ୍କର କୌଣସି ପତ୍ତା ମିଳି ନ ଥିଲା। ଗୋଲାପ ଓ ତାଙ୍କର ୩ ପୁଅ ଗୁରୁୁବାର ସକାଳେ ଖୋଜାଖୋଜି କରିବା ସମୟରେ ସାମାକୋଇ ନଦୀ ନରହରି ଗଣ୍ଡରେ ତାଙ୍କର ମୃତଦେହ ଭାସୁଥିବା ଦେଖିଥିଲେ। ଏନେଇ ଥାନାକୁ ଖବର ଦିଆଯିବାରୁ ପୋଲିସ ପହଞ୍ଚି ମୃତଦେହ ଉଦ୍ଧାର କରିଥିଲା।
