ସୋନପୁର,୧୪।୧୧(ନି.ପ୍ର.) – ସୁବର୍ଣ୍ଣପୁର ସହରର ରାମେଶ୍ୱର ନିକଟରେ ନିର୍ମିତ ହୋଇଥିବା ୩ଟି ହେଲିପ୍ୟାଡ୍ ଏବେ ନଷ୍ଟ ହେବାକୁ ବସିଛି । ହେଲିପ୍ୟାଡ୍ରେ ଚିପ୍ସ ଓ ବାଲି ଗଛିତ କରି ରଖାଯାଉଛି । ଚିପ୍ସ ବୋଝେଇ ଟିପର ଯିବା ଆସିବା ଫଳରେ ଏହା ନଷ୍ଟ ହେଉଛି। ସେହିପରି ଭାରିଯାନ ଚଳାଚଳ ଯୋଗୁଁ କୁଷ୍ଠାଶ୍ରମକୁ ଯାଇଥିବା ମ୍ୟୁନିସିପାଲିଟି ରାସ୍ତା ମଧ୍ୟ ଭାଙ୍ଗିରୁଜି ଗଲାଣି। ମାତ୍ର ଜିଲା ପ୍ରଶାସନର ଏଥିପ୍ରତି ଦୃଷ୍ଟି ନାହିଁ। ପ୍ରକାଶ ଯେ, ଗତ ଏପ୍ରିଲ ୬ ତାରିଖରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ନିର୍ବାଚନ ପ୍ରଚାର ପାଇଁ ବାୟୁସେନାର ୩ଟି ସ୍ବତନ୍ତ୍ର ହେଲିକପ୍ଟର ଯୋଗେ ସୋନପୁର ଆସିଥିଲେ। ହେଲିକପ୍ଟର ଅବତରଣ ପାଇଁ ୩୦ଲକ୍ଷ ଟଙ୍କା ବ୍ୟୟରେ ପୂର୍ତ୍ତ ବିଭାଗ ୩ଟି ସ୍ଥାୟୀ ହେଲିପ୍ୟାଡ ନିର୍ମାଣ କରିଥିଲା। ଲକ୍ଷ୍ୟ ଥିଲା ଭବିଷ୍ୟତରେ କୌଣସି ଭିଆଇପି ଜିଲା ଗସ୍ତ କଲେ ଏହି ହେଲିପ୍ୟାଡ ବ୍ୟବହାର କରି ପାରିବେ। କିନ୍ତୁ ଏହାର ସରକ୍ଷା ପାଇଁ କାହାରି ଦୃଷ୍ଟିନାହିଁ। ଏ ସମ୍ପର୍କରେ ପୂର୍ତ୍ତ ବିଭାଗର ନିର୍ବାହୀ ଯନ୍ତ୍ରୀ ଇଂ.ଅସିତ କୁମାର ବଡପଣ୍ଡା କୁହନ୍ତି, ଏହି ପ୍ରକଳ୍ପ ଆମେ ନିର୍ମାଣ କରିଛୁ । କିନ୍ତୁ ସ୍ଥାନଟି ରାଜସ୍ବ ବିଭାଗର। ଚିପ୍ସ ଓ ବାଲି ଜମା କରୁଥିବା ଠିକାଦାର ରାଜସ୍ବ ବିଭାଗ ନିକଟରୁ ଅନୁମତି ଆଣିଛନ୍ତି କି ନାହିଁ ତହସିଲଦାର କହିପାରିବେ କହି ନିଜ ବିଭାଗର ଦାୟିତ୍ୱକୁ ଏଡାଇ ଯାଇଥିଲେ। ଘଟଣା ସମ୍ପର୍କରେ ସୋନପୁର ତହସିଲଦାର ଅରବିନ୍ଦ ବେହେରା କୁହନ୍ତି, ମୋ ପାଖରେ ଏହି ଖବର ନଥିଲା। ସଦର ଆରଆଇଙ୍କୁ ପଠାଇ ଘଟଣାର ଅନୁଧ୍ୟାନ କଲା ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
