ଜୁନାଗଡ,୨୬।୭(ଡି.ଏନ.ଏ.): କଳାହାଣ୍ଡି ଜିଲା ଜୁନାଗଡ ସହର ଆରଏମ୍ସି ଗୋଦାମଠାରେ ଶୁକ୍ରବାର ନାଟ୍ୟ କଳା ମହାସଂଘର ଏକ ସାଙ୍ଗଠନିକ ସଭା ଅନୁଷ୍ଠିତ ହୋଇଯାଇଛି। ଜୁନାଗଡ ଓ ଗୋଲାମୁଣ୍ଡା ବ୍ଲକ ଜୋନ ନାଟ୍ୟ କଳାସଂଘ ପକ୍ଷରୁ ଏହାକୁ ଆୟୋଜନ କରାଯାଇଥିଲା। ଏଥିରେ କଳାହାଣ୍ଡି ଜିଲା ସମେତ ପଡୋଶୀ ନୂଆପଡା, ନବରଙ୍ଗପୁର ଓ ଛତିଶଗଡ ଅଞ୍ଚଳର ନାଟ୍ୟ କଳାକାରମାନେ ଯୋଗଦେଇଥିଲେ। ଜୟପାଟଣା ବ୍ଲକ ସଭାପତି ନବିନ ଧଙ୍ଗଡାମାଝିଙ୍କ ସଭାପତିତ୍ୱରେ ଅନୁଷ୍ଠିତ ସଭାରେ ମୁଖ୍ୟଅତିଥି ଭାବେ ମହାସଂଘ ସଭାପତି ପ୍ରିୟ ରଞ୍ଜନ ପଣ୍ଡା, ମୁଖ୍ୟବକ୍ତା ଭାବେ ମହାସଂଘ ସମ୍ପାଦକ ଡମ୍ବରୁଧର ବାଗ, ସମ୍ମାନିତ ଅତିଥି ଭାବେ ମହାସଂଘର ଉପସଭାପତି ପଦ୍ମକିଶୋର ଦୁର୍ଗା, ମହାସଂଘର ଉପଦେଷ୍ଟା ମନୋଜ କୁମାର ଦାସ, ନାଟ୍ୟଗୁରୁ ହୁକମତ୍ ନାଗେଶ, କୋକସରା ବ୍ଲକ ସଭାପତି ଭିକାରୀ ଦୁର୍ଗା, ସମ୍ପାଦକ କମଲ କୁମାର, କଲମପୁର ସଭାପତି ଅଶୋକ କର, କୃଷ୍ଣଚନ୍ଦ୍ର ଲେଞ୍ଜିଆ ପ୍ରମୁଖ ଯୋଗଦେଇଥିଲେ। ନାଟ୍ୟ କଳାକାରଙ୍କୁ ସରକାରଙ୍କ ପକ୍ଷରୁ କୌଣସି ପ୍ରୋତ୍ସାହନ ଯୋଗାଇ ଦିଆଯାଉ ନ ଥିବାରୁ ସେମାନେ ଏବେ ଦୟନୀୟ ଅବସ୍ଥାରେ ଜୀବନ ଯାପନ କରୁଛନ୍ତି। ଅନେକ କଳାକାର ବାଧ୍ୟ ହୋଇ ପେଟ ପାଇଁ ନିଜ ବୃତ୍ତିକୁ ଛାଡି ଦାଦନ ଖଟିଯିବା ସହ ଅନ୍ୟାନ କାମଧନ୍ଦା କରୁଛନ୍ତି। ଫଳରେ ଓଡିଶାର ସର୍ବପ୍ରାଚୀନ ନାଟ୍ୟ କଳା ଦିନକୁ ଦିନ ଲୋପ ପାଇବାକୁ ବସିଛି। ସରକାରଙ୍କ ପକ୍ଷରୁ ନାଟ୍ୟ କଳାକାରଙ୍କୁ ପ୍ରୋତ୍ସାହନ ଯୋଗାଇ ଦିଆଗଲେ ପୁଣିଥରେ ଉକ୍ତ କଳାକାରମାନେ ନିଜର ବୃତ୍ତିକୁ ଆପଣାଇ ଲୋକଙ୍କୁ ମନୋରଞ୍ଜନ କରିପାରିବେ ବୋଲି ସଭାରେ ବକ୍ତାମାନେ ଉଦ୍ବୋଧନ ଦେଇଥିଲେ। ସେହିପରି ନାଟ୍ୟକଳାକାରଙ୍କୁ ଏକତ୍ର ହୋଇ ସଙ୍ଗଠନକୁ ମଜଭୁଥ୍ କରିବା ସହ କଳାକୁ ପ୍ରସାରିତ କରିବା ପାଇଁ ଆହ୍ବାନ ଦିଆଯାଇଥିଲା। କାର୍ଯ୍ୟକ୍ରମକୁ ବେଦବର ଡୋଙ୍ଗରୀ ପରିଚାଳନା କରିଥିଲେ। ନାଟ୍ୟଗୁରୁ ସୁଧାଂଶୁ ଶେଖର ନାଏକ ଧନ୍ୟବାଦ ଦେଇଥିଲେ।
