ଯାଜପୁର ଟାଉନ,୨୯।୯(ଡି.ଏନ.ଏ.)- ଯାଜପୁରର ଅଧିଷ୍ଠାତ୍ରୀ ଦେବୀ ମା’ ବିରଜା ଅଷ୍ଟାଦଶ ଶକ୍ତିପୀଠରୁ ଅନ୍ୟତମ ଶକ୍ତିପୀଠଭାବେ ସାରା ବିଶ୍ୱରେ ପରିଚିତ। ଏହି ଶକ୍ତିପୀଠରେ ନାଭିଗୟାକ୍ଷେତ୍ର ଅବସ୍ଥିତ। ତ୍ରିଗୟା ମଧ୍ୟରୁ ନାଭିଗୟା ଅନ୍ୟତମ। ବିରଜା ମନ୍ଦିର ପରିସରରେ ଥିବା ନାଭିଗୟାକ୍ଷେତ୍ରରେ ବର୍ଷସାରା ରାଜ୍ୟ ତଥା ରାଜ୍ୟ ବାହାରୁ ଭକ୍ତମାନେ ଆସି ପିଣ୍ଡଦାନ କରିଥାନ୍ତି। ମାତ୍ର ବର୍ଷର ପିତୃପକ୍ଷ ଓ ମାତୃପକ୍ଷରେ ସର୍ବାଧିକ ଭକ୍ତ ନାଭିଗୟାରେ ପିଣ୍ଡଦାନ କରୁଥିବା ଦେଖିବାକୁ ମିଳେ। ସେହି ଉପଲକ୍ଷେ ପିତୃପକ୍ଷର ଅମାବାସ୍ୟା ମହାଳୟା ତିଥି ଥିବାରୁ ମା’ ବିରଜା ମନ୍ଦିର ପରିସରରେ ଥିବା ନାଭିଗୟାରେ ଭକ୍ତମାନେ ପିଣ୍ଡଦାନ କରିବା ନିମନ୍ତେ ପ୍ରବଳ ଭିଡ଼ ପରିଲକ୍ଷିତ ହୋଇଥିଲା। ପିତୃପକ୍ଷ ଆଶ୍ୱୀନ ମାସର କୃଷ୍ଣପକ୍ଷ ପ୍ରତିପଦାଠାରୁ ଆରମ୍ଭ ହୋଇ ଆଶ୍ୱିନ ମାସ ଅମାବାସ୍ୟା ପର୍ଯ୍ୟନ୍ତ ଚାଲିଥାଏ। ଏହି ୧୫ଦିନ ଧରି ଭକ୍ତମାନେ ନାଭିଗୟାରେ ପିଣ୍ଡଦାନ କରିଥାନ୍ତି। ପିତୃପକ୍ଷ ଆଶ୍ୱିନ ମାସର କୃଷ୍ଣପକ୍ଷ ପ୍ରତିପଦାଠାରୁ ଆରମ୍ଭ ହୋଇ ମହାଳୟା ତିଥିଦିନ ଶେଷ ହୋଇଥାଏ। ପିତୃପକ୍ଷରେ ନାଭିଗୟାରେ ପିଣ୍ଡଦାନ କଲେ ପିତୃଗଣ ମୋକ୍ଷ ହୁଅନ୍ତି ବୋଲି ପୁରାଣ ବର୍ଣ୍ଣିତ ଅଛି। ଏହି ୧୫ଦିନ ଧରି ନାଭିଗୟାରେ ପିଣ୍ଡଦାନ କରିବା ପାଇଁ ରାଜ୍ୟ ତଥା ରାଜ୍ୟ ବାହାରୁ ଭକ୍ତମାନେ ଆସି ପିଣ୍ଡଦାନ କରିବା ସହ ମା’ ବିରଜାଙ୍କ ଦର୍ଶନ ଲାଭ କରି କୃପାଲାଭ କରିଥାନ୍ତି। ପିତୃପକ୍ଷର ଶେଷଦିନ ମହାଳୟା ତିଥିରେ ମଙ୍ଗଳବାର ନାଭିଗୟା କ୍ଷେତ୍ରରେ ପିଣ୍ଡଦାନ ନିମନ୍ତେ ପ୍ରବଳ ଭକ୍ତଙ୍କ ଭିଡ଼ ହୋଇଥିଲା। ଭକ୍ତମାନେ ପିଣ୍ଡଦାନ ସାରି ମା’ ବିରଜାଙ୍କ ଦର୍ଶନ ସାରି ସ୍ବଗୃହ ଅଭିମୁଖେ ଗମନ କରିଥିଲେ। ଭକ୍ତଙ୍କ ଭିଡ଼କୁ ଲକ୍ଷ୍ୟ ରଖି ମନ୍ଦିର ପ୍ରଶାସକ ନାରାୟଣ ଚନ୍ଦ୍ର ଧଳଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଶାନ୍ତିଶୃଙ୍ଖଳା ସହ ଭକ୍ତମାନେ ପିଣ୍ଡଦାନ କରିବା ନିମନ୍ତେ ସମସ୍ତ ବନ୍ଦୋବସ୍ତ କରାଯାଇଥିଲା। ଭିଡ଼କୁ ଲକ୍ଷ୍ୟ ରଖି ଶାନ୍ତିଶୃଙ୍ଖଳା ନିମନ୍ତେ ଯାଜପୁର ଜିଲା ଆରକ୍ଷୀ ଅଧୀକ୍ଷକ ଚରଣ ସିଂ ମୀନାଙ୍କ ନିର୍ଦ୍ଦେଶକ୍ରମେ ଥାନାଧିକାରୀ ଆଶିଷ କୁମାର ସାହୁଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ବ୍ୟାପକ ପୋଲିସ ମୁତୟନ କରାଯାଇଥିଲା। ମା’ଙ୍କ ଅଙ୍ଗଲାଗି ସେବାୟତ ନରେନ୍ଦ୍ର ପାଣି, ଗୋବିନ୍ଦ ପାଣି, ନନ୍ଦକିଶୋର ପାଣି, ମୁରଲୀଧର ପାଣି, ଅମୂଲ୍ୟ ପାଣି, ବିଷ୍ଣୁଚରଣ ପାଣି-୧, ମୃତ୍ୟୁଞ୍ଜୟ ପାଣି, ଦେବାଶିଷ ପାଣି, ନୀଳକଣ୍ଠ ପାଣି, ଦୁର୍ଗାମାଧବ ପାଣି, ବାମଦେବ ପାଣି, ଅଗ୍ନେଶ୍ୱର ପାଣି, ବିଷ୍ଣୁଚରଣ ପାଣି-୨, ରଞ୍ଜନ ପାଣି, ସଞ୍ଜୟ ପାଣି, ଲକ୍ଷ୍ମୀଧର ପାଣି, ଚନ୍ଦ୍ରମଣି ପାଣି, ପ୍ରଦୀପ କୁମାର ପାଣି, ଅଶୋକ ପାଣି, କିଶୋର ପାଣି, ପ୍ରକାଶ ପାଣି ପ୍ରମୁଖ ପଣ୍ଡାମାନେ ଭକ୍ତମାନଙ୍କର ଶାନ୍ତିଶୃଙ୍ଖଳାର ସହ ପିଣ୍ଡଦାନ କରାଇଥିଲେ।
