ବଅଁରପାଳ,୨୨।୯(ଡି.ଏନ.ଏ) – ଅନୁଗୋଳ ଜିଲା ନାଲ୍କୋ ନଗରରେ ଚାଲିଥିବା ବିଶ୍ୱକର୍ମା ପୂଜାର ଶନିବାର ଥିଲା ୫ମ ସା। ନାଲ୍କୋରେ ପୂଜା ଆରମ୍ଭ କରିଥିବା ମୁଖ୍ୟ ପୂର୍ବତନ ମହାପ୍ରବନ୍ଧକ ପ୍ରଦୋଷ କୁମାର ମହାନ୍ତି ଅତିଥି ଭବେ ଯୋଗ ଦେଇଥିଲେ। ପୂଜା ଦେଖିବା ପାଇଁ ଜିଲା ସମେତ ରାଜ୍ୟର ବିଭିନ୍ନ ଅଞ୍ଚଳରୁ ଲକ୍ଷାଧିକ ଲୋକଙ୍କ ସମାଗମ ହୋଇଥିଲା।
ଚଳିତ ବର୍ଷ ପୂଜା କମିଟି ଗୁଡିକ ପକ୍ଷରୁ ପ୍ରତିଯୋଗିତା ମୂଳକ ଭାବେ ମେଢ଼ ନିର୍ମିତ ହୋଇଛି। ଆକର୍ଷଣୀୟ ତୋରଣ ସାଙ୍ଗକୁ ସୁସଜ୍ଜିତ ପୂଜା ମଣ୍ଡପମାନ ନିର୍ମିତ ହୋଇଛି। ପୂଜା ଅଞ୍ଚଳରେ ପଡିଥିବା ପଲିଶ୍ରୀ ମେଳାରେ ଜିନିଷ ପତ୍ର କିଣିବା ପାଇଁ ବହୁ ଲୋକଙ୍କ ଭିଡ଼ ହୋଇଥିଲା। ସେହିପରି ମିନା ବଜାର ଓ ଦୋଳିର ଭରପୁର ମଜା ନେଇଥିଲେ ଦର୍ଶକ। ବିଭିନ୍ନ କମିଟି ପକ୍ଷରୁ ଲୋକଙ୍କୁ ସଚେତନତା କରିବା ଉଦ୍ଦେଶ୍ୟରେ କାର୍ଟୁନ ମୂର୍ତ୍ତି ନିର୍ମିତ କରାଯାଇଛି। ପୌରାଣିକ କଥା ବସ୍ତୁକୁ ଆଧାର କରି କରାଯାଇଥିବା ମେଢ଼ ଗୁଡିକ ଦର୍ଶକଙ୍କୁ ବେଶ ଆକର୍ଷିତ କରିଛି। ସେହିପରି ଶାନ୍ତିଶୃଙ୍ଖଳା ନିମନ୍ତେ ପୋଲିସ ପକ୍ଷରୁ କଡ଼ା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି। ପୂଜା ଯୋଗୁ ଭୂଷଣଠାରୁ ଅନୁଗୋଳ ପର୍ଯ୍ୟନ୍ତ ୫୫ ନଂ. ଜାତୀୟ ରାଜପଥରେ ଟ୍ରାଫିକ ସୃଷ୍ଟି ହେବା ସହ ରାସ୍ତାରେ ବହୁ ଯାନବାହନ ଅଟକି ରହିଥିଲା। ରବିବାର ଏହି ପୂଜାର ଶେଷ ଦିବସ। ସୋମବାର ଦିନ ୧୧ ଟାରୁ ଭସାଣି କାର୍ଯ୍ୟକ୍ରମ ଆରମ୍ଭ ହେବ ବୋଲି ଜଣାପଡ଼ିଛି।
