ବଅଁରପାଳ, ୧୮।୯ (ଡି.ଏନ୍.ଏ.)-ଅନୁଗୋଳ ଜିଲା ନାଲ୍କୋର ଗଣପର୍ବ ଭାବେ ପରିଚିତ ବିଶ୍ୱକର୍ମା ପୂଜା ମଙ୍ଗଳବାର ଠାରୁ ଆରମ୍ଭ ହୋଇଛି। ଚଳିତ ବର୍ଷ ୨୩ଟି ମଣ୍ଡପରେ ପ୍ରଭୁ ଦେବଶିଳ୍ପୀଙ୍କୁ ଆରାଧନା କରାଯାଉଥିବା ବେଳେ ପୂଜା ଦେଖିବାକୁ ପ୍ରଥମ ଦିନରେ ପ୍ରାୟ ୩୦ ହଜାରରୁ ଊର୍ଦ୍ଧ୍ୱ ଶ୍ରଦ୍ଧାଳୁଙ୍କ ସମାଗମ ହୋଇଥିବା ସୂଚନା ମିଳିଛି।
ଚଳିତବର୍ଷ ବିଭିନ୍ନ ପୂଜା କମିଟି ପକ୍ଷରୁ ମଣ୍ଡପ ଓ ତୋରଣକୁ ଅଧିକ ଆକର୍ଷଣୀୟ କରାଯାଇଛି। ପଟ୍ଲାଇନ, ସିପିପି ଅପରେଶନ୍, କାଷ୍ଟହାଉସ-ଏ, କାଷ୍ଟହାଉସ-ବି, ରୋଡିଂସପ୍, ସିପିପି ମେକାନିକାଲ, ସିଏଚ୍ପି, ସେଣ୍ଟ୍ରାଲ ଷ୍ଟୋର, ଆର୍ପିୟୁ, ଟୁ-୨୦ କେଭି, ସିଭିଲ୍, ପଟ୍ଲାଇନ ଇଲେକ୍ଟ୍ରିକାଲ, ଠିକାଦାର ସଂଘ ସହ ମୋଟ୍ ୨୩ଟି ମଣ୍ଡପର ସାଜସଜ୍ଜା ଦର୍ଶକଙ୍କ ମନ ମୋହିନେଇଛି। ନାଲ୍କୋ ଟ୍ରକ୍ମାଲିକ ସଂଘ ପକ୍ଷରୁ ମଧ୍ୟ ପୂଜାମଣ୍ଡପକୁ ଚଳିତବର୍ଷ ବେଶ୍ ମନଲୋଭା କରାଯାଇଛି। ପୂର୍ବାହ୍ନ ୧୦ ଟାରୁ ପାରମ୍ପରିକ ରୀତିରେ ପୂଜା କମିଟି କର୍ମକର୍ତ୍ତାମାନେ କଳସ ଶୋଭାଯାତ୍ରାରେ ପାଣି ଆଣି ଘଟ ସ୍ଥାପନ କରିବା ପରେ ପୂଜାକାର୍ଯ୍ୟ ଆରମ୍ଭ ହୋଇଥିଲା। ଅପରାହ୍ନ ୨ଟା ପର୍ଯ୍ୟନ୍ତ ବିଭିନ୍ନ ମଣ୍ଡପରେ ପୂଜାର୍ଚ୍ଚନା ଚାଲିଥିବା ବେଳେ ଢୋଲ ନିଶାଣ ବାଦ୍ୟ ସାଙ୍ଗକୁ ହିରବୋଲ, ହୁଳହୁଳିରେ ଆଲୁମିନିୟମ ନଗରୀ ପ୍ରକମ୍ପିତ ହୋଇପଡ଼ିଥିଲା।
