ନୂଆଦିଲ୍ଲୀ,୧୪।୨: ନିର୍ଭୟା ଗଣବଳାତ୍କାର ମାମଲାରେ ଦୋଷୀଙ୍କୁ ଅଲଗା ଅଲଗା ଫାଶୀ ଦେବାକୁ ନେଇ ଶୁକ୍ରବାର ଶୁଣାଣି ଚାଲୁଥିବା ସମୟରେ କୋର୍ଟ ଭିତରେ ଜଷ୍ଟିସ ଆର୍. ଭାନୁମଥି ବେହୋସ୍ ହୋଇଯାଇଥିବା ଜଣାପଡିଛି। ଏହାପରେ ଶୁଣାଣିକୁ ସ୍ଥଗିତ ରଖାଯାଇଛି। ଏହାପରେ ତାଙ୍କୁ ତାଙ୍କ ଚାମ୍ବରକୁ ନିଆଯାଇଥିଲା। ଡାକ୍ତର ତାଙ୍କ ଚିକିତ୍ସା କରୁଥିବା ସୂଚନା ମିଳିଛି। ତେବେ ଜଷ୍ଟିସ ଭାନୁମଥି ଜ୍ୱରରେ ପୀଡତ ଥିବାରୁ ଏଭଳି ହୋଇଥିବା କହିଛନ୍ତି ସଲିସିଟର ଜେନରାଲ ତୁଷାର ମେହେଟା। ଏବେ ତାଙ୍କର ଚିକତ୍ସା ଚାଲୁଥିବା ବେଳେ ଏହି ମାମଲାର ଶୁଣାଣି ପରେ ତାଙ୍କ ଚାମ୍ବରରେ ହୋଇପାରେ ବୋଲି ସୂଚନା ମିଳିଛି। ପ୍ରକାଶ ଥାଉକି ୨୦୧୨ର ବହୁଚର୍ଚ୍ଚିତ ନିର୍ଭୟା ଗଣବଳାତ୍କାର ମାମଲାରେ ଦୋଷୀ ସାବ୍ୟସ୍ତ ହୋଇଥିବା ୪ ଦୋଷୀଙ୍କୁ ଫାଶୀ ଦେବାପାଇଁ ୨ ଥର ଡେଥ୍ ଓ୍ବାରେଣ୍ଟ ଜାରି କରାଯାଇଥିବା ବେଳେ କେତେକ ନ୍ୟାୟିକ ବ୍ୟବସ୍ଥା ଦୃଷ୍ଟିରୁ ଏମାନଙ୍କୁ ଫାଶୀ ଦିଆଯାଇ ପାରି ନାହିଁ। ଅନ୍ୟପଟେ ଏହାକୁ ନେଇ କେନ୍ଦ୍ର ସରକାର କହିଥିଲେ କି ଯେଉଁମାନଙ୍କର ସମସ୍ତ ନ୍ୟାୟିକ ବ୍ୟବସ୍ଥା ସରିଯାଇଛି ସେମାନଙ୍କ ପାଇଁ ଡେଥ୍ ଓ୍ବାରେଣ୍ଟ ଜାରି କରାଯାଉ ଅର୍ଥାତ୍ ଅଲଗା ଅଲଗା ଭାବେ ୪ ଦୋଷୀଙ୍କୁ ଫାଶୀ ଦିଆଯାଉ।
