ଭୁବନେଶ୍ୱର, ୧୯ା୭(ବ୍ୟୁରୋ) : ରାଜଧାନୀର ବିଭିନ୍ନ ସରକାରୀ ସ୍ଥାନକୁ ଜବରଦଖଲ କରି ବେଆଇନ ନିଶା କାରବାର ଚାଲୁଛି। ବିଭିନ୍ନ ଦୋକାନ ଖୋଲି ସେଥିରେ ନିଶାଦ୍ରବ୍ୟ ବ୍ୟବସାୟ କରାଯାଉଛି। ସେହି ଦୋକାନଗୁଡିକ ଚିହ୍ନଟ କରି ତାହାକୁ ଉଚ୍ଛେଦ କରିବା ପାଇଁ ବିଏମସିକୁ ଚିଠି କରାଯାଇଛି। ସପ୍ତାହକ ମଧ୍ୟରେ ୩୦ ମାମଲା ରୁଜୁ କରାଯାଇ ଅଭିଯୁକ୍ତମାନଙ୍କୁ ଜେଲ ପଠାଇ ଦିଆଯାଇଯାଇଛି। ନିଶା କାରବାରରେ ସଂପୃକ୍ତ ପେସାଦାର ବେପାରୀଙ୍କ ଉପରେ ୧୧୦ ଦଫା ଲଗାଯିବ ବୋଲି ଭୁବନେଶ୍ୱର ଡିସିପି ଅନୁପ ସାହୁ କହିଛିନ୍ତି।
ଡିସିପି ସାହୁ କହିଛନ୍ତି, ଅନେକ ଶିକ୍ଷା ଅନୁଷ୍ଠାନ ଓ ସରକାରୀ ସ୍ଥାନରେ ନିଶା କାରବାରରେ ସଂପୃକ୍ତ ଅଭିଯୁକ୍ତମାନେ ବେଆଇନ ଭାବେ ଘର କରି ଓ କ୍ୟାବିନ ପକାଇ ବେପାର ଚଳାଇଛନ୍ତି। ସେମାନେ ଗିରଫ ହୋଇ ଜେଲରୁ ଫେରିବା ପରେ ପୁଣି ସେଠାରେ କାରବାର ଚଳାଉଛନ୍ତି। ତେଣୁ ଆଗକୁ ସେମାନଙ୍କ ଉପରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ସେମାନଙ୍କ ଦୋକନଗୁଡିକୁ ବିଡିଏ ଏନ୍ଫୋର୍ସମେଣ୍ଟ ଟିମ୍ ସମ୍ପୂର୍ଣ୍ଣ ଉଚ୍ଛେଦ କରିବ। ଏଥିସହ ଯୁବପିଢି ଓ ଛାତ୍ରୀଛାତ୍ର ବ୍ରାଉନସୁଗାର ନିଶା କବଳରୁ ଦୂରେଇ ରହିବା ନେଇ ରାଜଧାନୀରେ ଏହି ସ୍ବତନ୍ତ୍ର ଚଢାଉ କାର୍ଯ୍ୟକ୍ରମ ଜାରି ରହିବ। ବେଆଇନ ନିଶା କାରବାର ଉପରେ ରୋକ୍ ଲଗାଇବା ନେଇ ପୋଲିସ କମିଶନରଙ୍କୁ ଆଉ ତିନୋଟି ପ୍ରସ୍ତାବ ଦିଆଯାଇଥିବାବେଳେ ଶୀଘ୍ର ଏହା କାର୍ଯ୍ୟକାରୀ ହେବ ବୋଲି ଡିସିପି କହିଛନ୍ତି।
