ସମ୍ବଲପୁର, ୧୬।୪ (ବ୍ୟୁରୋ)-କରୋନା କଟକଣା ଓ ଏହାର ସଂକ୍ରମଣ ରୋକିବା ପାଇଁ ସରକାର ବିଭିନ୍ନ ପଦକ୍ଷେପ ନିଆଯାଉଛି। ଏହାର ପ୍ରତିଷେଧକ ପାଇଁ ସାମାଜିକ ଦୂରତ୍ୱ ଏକ ପ୍ରମୁଖ ମାଧ୍ୟମ ବୋଲି ସରକାର ଘୋଷଣା କରି ପାଳନ କରିବାକୁ ସମସ୍ତଙ୍କୁ କଡା ନିର୍ଦ୍ଦେଶ ଦିଆଯାଉଛି। ହେଲେ ସମ୍ବଲପୁର ଜିଲାରେ ଏହାର ବ୍ୟତିକ୍ରମ ଦେଖାଦେଇଛି। ଖୋଦ୍ ସରକାରୀ କାମରେ ନିୟୋଜିତ ଶ୍ରମିକମାନେ ସାମାଜିକ ଦୂରତ୍ୱ ପାଳନ କରୁ ନ ଥିବା ଦେଖିବାକୁ ମିଳିଛି । ଜିଲା ସଦର ଡାକ୍ତରଖାନାରେ ନିର୍ମାଣାଧୀନ କୋଭିଡ- ୧୯ ମେଡିକାଲରେ ନିୟୋଜିତ ଥିବା ଶ୍ରମିକମାନଙ୍କ କ୍ଷେତ୍ରରେ ଏହା ଦେଖିବାକୁ ମିଳିଛି। ଗୁରୁବାର ଏକ ପିକଅପ୍ ଭ୍ୟାନରେ ପ୍ରାୟ ୧୨ରୁ ଊର୍ଦ୍ଧ୍ୱ ଶ୍ରମିକ ଟ୍ରଲିରେ ବସି ଧନୁପାଲି କ୍ୟାମ୍ପକୁ ଯାଉଥିଲେ। ଏହି ସମୟରେ ଲକ୍ଷ୍ମୀଟକିଜ ଟ୍ରାଫିକ ଛକରେ ଏସଡିପିଓ ତପନ କୁମାର ସ୍ବାଇଁ ଓ ଅନ୍ୟାନ୍ୟ କର୍ମଚାରୀ ପିକଅପ୍କୁ ଅଟକାଇଥିଲେ । ଗାଡି ଚାଳକ କୋଭିଡ- ୧୯ରେ ମେଡିକାଲ କାମରେ ନିୟୋଜିତ ଥିବା ଗାଡିର ପାସ୍ ଦେଖାଇଥିଲେ । ହେଲେ ପୋଲିସ ଏକାସଙ୍ଗରେ ଏତେ ଶ୍ରମିକମାନଙ୍କୁ ନେବା ଆଣିବା ନିୟମ ବାହାରେ ବୋଲି କହି ସାମାଜିକ ଦୂରତ୍ୱ ନିୟମ ପାଳନ କରାଯାଉ ନାହିଁ ବୋଲି କହିଥିଲା। ପ୍ରାୟ ୫ଜଣ ଶ୍ରମିକଙ୍କୁ ଗାଡିରେ ଯିବାକୁ କହି ଅନ୍ୟ ଶ୍ରମିକଙ୍କୁ ଓହ୍ଲାଇ ଦେଇଥିଲା। ଫଳରେ କିଛି ସମୟ ପରେ ପୁଣି ପିକଅପ୍ ଆସି ସେହି ଶ୍ରମିକମାନଙ୍କୁ ନେଇ କ୍ୟାମ୍ପକୁ ଯାଇଥିଲା।
