ନୂଆଦିଲ୍ଲୀ,୧୧।୬: ପ୍ରବର୍ତ୍ତନ ନିର୍ଦ୍ଦେଶାଳୟ(ଇଡି) ନୀରବ ମୋଦି ଏବଂ ମେହୁଲ ଚୋକ୍ସିଙ୍କ ୧୩୫୦ କୋଟି ଟଙ୍କାର ଗହଣାକୁ ଜବତ କରିଥିବା ଜଣାପଡ଼ିଛି। ୨୩୦୦ କିଲୋ ଗ୍ରାମର ପଲିସ ହୋଇଥିବା ହୀରା ଏବଂ ପର୍ଲସକୁ ହଂକଂରୁ ଅଣାଯାଇଥିବା ଜଣାପଡ଼ିଛି। ଏହାର ଦାମ୍ ପ୍ରାୟ ୧୩୫୦ କୋଟି ଟଙ୍କା ଆକଳନ କରାଯାଇଥିବା ବେଳେ ନୀରବ ମୋଦି ଏବଂ ମେହୁଲ ଚୋକ୍ସିଙ୍କ ଫାର୍ମ ସହ ଜଡିତ ବୋଲି ଜଣେ ବରିଷ୍ଠ ଅଧିକାରୀ ସୂଚନା ଦେଇଛନ୍ତି। ମୁମ୍ବାଇରେ ପହଞ୍ଚିଥିବା ୧୦୮ କନ୍ସାଇନମେଣ୍ଟ ମଧ୍ୟରୁ ୨୨ଟି ନୀରବ ମୋଦିଙ୍କ ବିଦେଶ ୟୁନିଟର ହୋଇଥିବା ବେଳେ ବଳକା ଚୋକ୍ସିଙ୍କ ଫାର୍ମର ବୋଲି ସୂଚନା ରହିଛି। ବେଆଇନ ଅର୍ଥ କାରବାର ନିରୋଧୀ ଆଇନ (ପିଏମ୍ଏଲ୍ଏ) ପଞ୍ଜାବ ନ୍ୟାଶନାଲ ବ୍ୟାଙ୍କର ପ୍ରାୟ ୧୩ ହଜାର କୋଟି ଟଙ୍କାର ଋଣ ଠକେଇ ମାମଲାରେ ବର୍ତ୍ତମାନ ଏମାନଙ୍କ ବିରୋଧରେ ଇଡି ତଦନ୍ତ ଜାରି ରଖିଛି। ହଂକଂ କର୍ତ୍ତୃପକ୍ଷଙ୍କ ସହ ସମସ୍ତ ଆଇନଗତ ପ୍ରକ୍ରିୟା ଶେଷ ହେବା ପରେ ଗହଣା ଭାରତକୁ ଅଣାଯାଇଛି।
