କିଙ୍ଗଷ୍ଟନ, ୨୫ା୫ (ଏଏଫ୍ପି)- କରୋନାଭାଇରସ୍ ଯୋଗୁ ନୂଆ ରୂପରେ ଦେଖିବାକୁ ମିଳୁଛି ଟି୧୦ କ୍ରିକେଟ। ଷ୍ଟାଡିୟମରେ ସମର୍ଥକ ଉପସ୍ଥିତ ନାହାନ୍ତି। ବଲ୍କୁ ଚକ୍ଚକ୍ କରିବା ଲାଗି ବୋଲରମାନେ ସାଲିଭା (ପାଟିର ଲାଳ) ବ୍ୟବହାର ଉପରେ କଟକଣା ରହିଛି। ବାଉଣ୍ଡାରିି ଲାଇନ୍ରେ ସାନିଟାଇଜର ରହୁଛି। ବିଶ୍ୱରେ କରୋନାଭାଇରସ୍ର ପ୍ରକୋପ ଥମି ନ ଥିବା ବେଳେ ଚଳିତ ସପ୍ତାହରେ କ୍ୟାରିବିୟନରେ ଭିନ୍ସି ଟି୧୦ ପ୍ରିମିୟର ଲିଗ୍ ଆରମ୍ଭ ହୋଇଛି। ଏଥିରେ ୬ଟି ଦଳ ଅଂଶଗ୍ରହଣ କରିଛନ୍ତି। ପ୍ରାକୃତିକ ସୌନ୍ଦର୍ଯ୍ୟରେ ପରିପୂର୍ଣ୍ଣ ଆରୋନ୍ସ ଭେଲ୍ ଭେନ୍ୟୁରେ ଏହା ଅନୁଷ୍ଠିତ ହେବ। କରୋନାଭାଇରସ୍ ମହାମାରୀ ସମୟରେ କୌଣସି ଟେଷ୍ଟ କ୍ରିକେଟ ଖେଳୁଥିବା ରାଷ୍ଟ୍ରରେ ପ୍ରଥମ ଥର ଏକ କ୍ରିକେଟ ଟୁର୍ନାମେଣ୍ଟ ଅନୁଷ୍ଠିତ ହେଉଛି। ଦେଶରେ କରୋନାଭାଇରସ ଆକ୍ରାନ୍ତଙ୍କ ସଂଖ୍ୟା ମାତ୍ର ୧୮ରହିଥିବାରୁ ସଂକ୍ରମଣ ରିସ୍କ କମ୍ ରହୁଛି। ଏହା ସତ୍ତ୍ୱେ ଷ୍ଟାଡିୟମରେ ଦର୍ଶକମାନଙ୍କୁ ଅନୁମତି ନ ଦେବା ଲାଗି ସ୍ଥିର ହୋଇଥିଲା। ମାତ୍ର ପରବର୍ତ୍ତୀ କାଳରେ ୩୦୦ କିମ୍ବା ଅତିବେଶିରେ ୫୦୦ ଦର୍ଶକଙ୍କୁ ମ୍ୟାଚ ଦେଖିବା ଲାଗି ଅନୁମତି ଦେବା ଲାଗି ବିଚାର କରାଯାଇଥିଲା। କିନ୍ତୁ କେତେଜଣ ବିଶେଷଜ୍ଞ ଏନେଇ ଉଦ୍ବେଗ ପ୍ରକାଶ କରିଥିଲେ। ଦର୍ଶକମାନଙ୍କ କଥା ବିଚାର କରିବା ପୂର୍ବରୁ ଖେଳାଳିମାନଙ୍କ ମ୍ୟାନେଜମେଣ୍ଟ ପ୍ରଥମେ ନିୟମିତ କରାଯିବା ଦରକାର ବୋଲି ସେମାନେ ପରାମର୍ଶ ଦେଇଥିବା ସେଣ୍ଟ ଭିନ୍ସେଣ୍ଟ ଗ୍ରେନାଡିନ୍ସ କ୍ରିକେଟ ଆସୋସିଏଶନ ସଭାପତି କିଶୋର ଶାଲୋ ସୂଚନା ଦେଇଛନ୍ତି। ଟୁର୍ନାମେଣ୍ଟ ମେ ୩୧ରେ ଶେଷ ହେବ। ୬ଜଣ ମାର୍କି ଖେଳାଳିଙ୍କ ମଧ୍ୟରୁ ଷ୍ଟାର ଖେଳାଳି ସୁନୀଲ ଆମ୍ବ୍ରିସଙ୍କ ଉପରେ ସ୍ଥାନୀୟ ସମର୍ଥକଙ୍କ ବିଶେଷ ନଜର ରହିଛି। ଆମ୍ବ୍ରିସ ୨୦୧୭ରେ ନ୍ୟୁଜିଲାଣ୍ଡରେ ଏକ ସିରିଜରେ ଓ୍ବେଷ୍ଟଇଣ୍ଡିଜ ତରଫରୁ ଟେଷ୍ଟ ପଦାର୍ପଣ କରିଥିଲେ। କ୍ରମାଗତ ଦୁଇଟି ଇନିଂସରେ ହିଟ୍ ଉଇକେଟ ହୋଇ ଆଉଟ ହେବାରେ ସେ କ୍ରିକେଟ ଇତିହାସରେ ପ୍ରଥମ ଖେଳାଳି ହୋଇଛନ୍ତି।
