ଫିଲ୍ମଜଗତର ମିଷ୍ଟର ପରଫେକ୍ସନିଷ୍ଟ କୁହାଯାଉଥିବା ଅମୀର ଖାନ୍ ପ୍ରତିବର୍ଷ କିଛି ନା କିଛି ଫିଲ୍ମ କରୁଛନ୍ତି। ଚଳିତବର୍ଷ ମଧ୍ୟ ଏକ ଫିଲ୍ମର ପ୍ରଯୋଜନା କରିବାକୁ ଯାଉଛନ୍ତି। ଯାହାର ନାଁ ‘ଲାଲ୍ ସିଂ ଚଢ଼ା’। ଯାହା ଏକ ଆମେରିକାନ୍ ଫିଲ୍ମର ରିମେକ୍।
ହଲିଉଡ ଚଳଚ୍ଚିତ୍ର ଫରେଷ୍ଟ ଗମ୍ପର କାହାଣୀକୁ ଆଧାର କରି ନିର୍ଦ୍ଦେଶକ ଅଦୈତ ଚନ୍ଦନ ‘ଲାଲ ସିଂ ଚଢ଼ା’ ଚଳଚ୍ଚିତ୍ରର ନିର୍ମାଣ କରୁଛନ୍ତି। ଏହାର ପ୍ରଯୋଜନା ଦାୟିତ୍ୱରେ ଅମୀର ଥିବାବେଳେ ଏଥିରେ ମୁଖ୍ୟ ଭୂମିକାରେ ମଧ୍ୟ ଅମୀର ଅଭିନୟ କରୁଛନ୍ତି। ତାଙ୍କ ସହ କରୀନା କପୁର ଖାନ୍ ନଜର ଆସିବେ। ଫିଲ୍ମର ସ୍କ୍ରିପ୍ଟ ଏବଂ କାଷ୍ଟିଂ ମଧ୍ୟ ସରିଛି। ଖୁବ୍ଶୀଘ୍ର ଏହାର ଶୁଟିଂ ଆରମ୍ଭ ହେବ।
ଏହା ପୂର୍ବରୁ ଅମୀରଙ୍କ ସହ କରୀନା ‘ଥ୍ରୀ ଇଡିଅଟ୍ସ’ରେ ଅଭିନୟ କରି ବଲିଉଡ୍ରେ ହିଟ୍ ଯୋଡ଼ି ସାବ୍ୟସ୍ତ ହୋଇଥିଲେ। କରୀନା କୁହନ୍ତି, ଏହି ଫିଲ୍ମ ପାଇଁ ସେ ଖୁବ୍ ଉତ୍ସାହିତ ଥିବାବେଳେ ନୂଆ ଲୁକ୍ରେ ସେ ଦର୍ଶକଙ୍କ ସାମ୍ନାକୁ ଆସିବେ।
କହିରଖୁଛୁ, ଏହା ପୂର୍ବରୁ ଅମୀରଙ୍କ ସହିତ ଲିଡ୍ ଭୂମିକା ପାଇଁ କ୍ରିତି ସାନନ୍ ଏବଂ ୟାମି ଗୌତମଙ୍କ ନାମ ଚର୍ଚ୍ଚା ହେଉଥିଲା। ପରେ କରୀନାଙ୍କୁ ନିଆଯାଇଛି। ‘ଲାଲ୍ ସିଂ ଚଢ଼ା’ ଫିଲ୍ମଟି ସାମାଜିକ ଏବଂ ରାଜନୈତିକ ବିଷୟ ଉପରେ ଆଧାରିତ।
