ମିରଟ୍: ଲକ୍ଡାଉନ ପାଇଁ ଏବେ ସବୁଆଡ଼େ କଟକଣା। ରାତି ୭ରୁ ସକାଳ ୭ ଯିବାଆସିବା ବନ୍ଦ। ଏଥିସହ ବାଇକ୍ ଚାଳକଙ୍କ ଲାଗି ପାସ୍ ସହିତ ମାସ୍କ ଓ ହେଲ୍ମେଟ୍ ବାଧ୍ୟତାମୂଳକ। ଏବେ ଲକ୍ଡାଉନର ଚତୁର୍ଥ ପର୍ଯ୍ୟାୟ ଆରମ୍ଭ ହୋଇଥିବା ବେଳେ କେତେଜଣ କଟକଣା କୋହଳ କରାଯାଇଛି। ହେଲେ କେତେକ ଲୋକ ଅଛନ୍ତି, ସବୁ କଟକଣାକୁ ଫୁ କରିଦେଉଛନ୍ତି। ଫଳରେ ପୋଲିସ ସେମାନଙ୍କ ଉପରେ ଦାଉ ସାଧୁଛି। ଏଭଳି ଏକ ଘଟଣା ଦେଖିବାକୁ ମିଳିଛି ମିରଟ୍ରେ। ଲକ୍ଡାଉନ୍ରେ ସରକାରୀ କଟକଣାକୁ ନ ମାନି ବାଇକ୍ରେ ଯାଉଥିବା କେତେଜଣ ବ୍ୟକ୍ତି ମୁହଁରେ ମାସ୍କ ପିନ୍ଧି ନ ଥିବାରୁ ପୋଲିସ ହାବୁଡ଼ରେ ପଡ଼ିଥିଲେ। ପୋଲିସ ସେମାନଙ୍କଠାରୁ ଜରିମାନା ସହ ଦଣ୍ଡବିଧାନ କରିଥିଲା। ସେତିକି ବେଳେ ସେଇପଟ ଦେଇ ଯାଉଥିବା ଦୁଇ ବାଇକ୍ ଆରୋହୀ ପୋଲିସ ହାବୁଡ଼ରେ ପଡ଼ିଥିଲେ। ବାଇକ୍ ଚାଳକ ଜଣକ ମୁହଁରେ ରୁମାଲ ବାନ୍ଧିଥିବା ବେଳେ ପଛରେ ବସିଥିବା ବ୍ୟକ୍ତି ଜଣକ ଏକ ୧୦ ଟଙ୍କଆ ନୋଟ୍କୁ ମାସ୍କଭାବେ ମୁହଁରେ ପିନ୍ଧିଦେଇଥିଲେ। ହେଲେ ମିରଟ୍ର ସିଭିଲ ଲାଇନ୍ସ ଥାନାର ସର୍କଲ ଅଫିସର ସଞ୍ଜୀବ ଦେଶଓ୍ବାଲ ତାଙ୍କୁ ଧରିଥିଲେ। କାହିଁକି ମାସ୍କ ନ ପିନ୍ଧି ବାହାରକୁ ବାହାରିଛ ବୋଲି ପଚରାଯିବାରୁ ସେମାନଙ୍କଠାରୁ ସନ୍ତୋଷଜନକ ଉତ୍ତର ପୋଲିସ ପାଇ ନ ଥିଲା। ନୋଟ୍ ମାସ୍କ ପିନ୍ଧିଥିବା ବ୍ୟକ୍ତି ମାସ୍କ ଦର ଅନୁଯାୟୀ ତାଙ୍କ ପାଖରେ ଟଙ୍କା ନ ଥଇବା କଥା କହିବାରୁ ପୋଲିସ ସେମାନଙ୍କୁ ୨ଟି ମାସ୍କ ପ୍ରଦାନ କରିଥିଲେ। ବିନା ମାସ୍କରେ ବାହାରକୁ ଆସିଲେ ଜରିମାନା ସହ କଠୋର ଦଣ୍ଡ ମିଳିବ ବୋଲ ପୋଲିସ ସେମାନଙ୍କୁ ଚେତାବନୀ ଶୁଣାଇଥିଲା। ପ୍ରକାଶଥାଉ କି, ମିରଟ୍ରେ ଏବେ କରୋନା ଆକ୍ରାନ୍ତଙ୍କ ସଂଖ୍ୟା ୩୧୪ ରହିଛି। ଏହି ଜିଲାରେ ୨୦୦ ଆକ୍ଟିଭ୍ ମାମଲା ରହିଥିବା ବେଳେ ୧୭ ଜଣଙ୍କ ମୃତ୍ୟୁ ହୋଇସାରିଲାଣି।
