ଫତୋର୍ଦା, ୧୧।୧୨- ଇଣ୍ଡିଆନ ସୁପରଲିଗ୍ରେ ଶୁକ୍ରବାର ଏଟିକେ ମୋହନ ବାଗାନ ଓ ହାଇଦ୍ରାବାଦ ଏଫସି ମ୍ୟାଚ ୧-୧ ଗୋଲରେ ଡ୍ର ରହିଛି। ଫଳରେ ଉଭୟ ଦଳ ଗୋଟିଏ ଲେଖାଏ ପଏଣ୍ଟ ଭାଗ କରିଛନ୍ତି। ପ୍ରଥମାର୍ଦ୍ଧ ଗୋଲଶୂନ୍ୟ ରହିବା ପରେ ଦ୍ୱିତୀୟାର୍ଦ୍ଧ ଆରମ୍ଭରୁ ଗୋଲ ଦେବାପାଇଁ ଦୁଇ ଦଳର ଖେଳାଳିମାନେ ଭରପୂର ପ୍ରୟାସ କରିଥିଲା। ୫୪ତମ ମିନିଟରେ ମନଭୀର ସିଂ ଏକ ଗୋଲ ଦେଇ ଏଟିକେ ମୋହନ ବାଗାନକୁ ଅଗ୍ରଣୀ କରାଇଥିଲେ। ଏହାର ୧୦ ମିନିଟ ପରେ ଗୋଲ ପରିଶୋଧ ପାଇଁ ହାଇଦ୍ରାବାଦ ନିକଟରେ ସୁବର୍ଣ୍ଣ ସୁଯୋଗ ପହଞ୍ଚତ୍ଥିଲା। ୬୪ତମ ମିନିଟରେ ବକ୍ସ ଏରିଆ ମଧ୍ୟରେ ସୌଭିକ୍ ଚକ୍ରବର୍ତ୍ତୀଙ୍କୁ ମନଭୀର ଟାଣି ତଳେ ପକାଇବା ଅଭିଯୋଗରେ ରେଫରି ହାଇଦ୍ରାବାଦକୁ ପେନାଲ୍ଟି ସୁଯୋଗ ଦେଇଥିଲେ। ୬୫ତମ ମିନିଟରେ ଜୋଆଓ ଭିକ୍ଟର ଏହାକୁ ଗୋଲରେ ପରିଣତ କରି ମ୍ୟାଚକୁ ସମାନ ସ୍ତରକୁ ନେଇ ଆସିଥିଲେ। ୫ ମ୍ୟାଚରୁ ୧୦ ପଏଣ୍ଟ ସହ ଏଟିକେ ଟେବୁଲର ଦ୍ୱିତୀୟକୁ ଏବଂ ୪ ମ୍ୟାଚରୁ ୬ ପଏଣ୍ଟ ପାଇ ହାଇଦ୍ରାବାଦ ୫ମ ସ୍ଥାନକୁ ଉନ୍ନୀତ ହୋଇଛି।
