ଜମନକିରା,୩।୮(ଡି.ଏନ୍.ଏ.): ସମ୍ବଲପୁର ଜିଲା ଜମନକିରା ବ୍ଲକ୍ ସଦରମହକୁମାର ଚାରିଆଡ଼େ ଅଳିଆ ଆବର୍ଜନାରେ ଭର୍ତ୍ତି ହୋଇଥିବାବେଳେ ପଞ୍ଚାୟତ କର୍ତ୍ତୃପକ୍ଷ ନୀରବଦ୍ରଷ୍ଟା ସାଜିଛନ୍ତି। ବାରମ୍ବାର ଅଭିଯୋଗ ସତ୍ତ୍ୱେ ପ୍ରତିକାର ବ୍ୟବସ୍ଥା କରାଯାଉନାହିଁ। ଟାଳଟୁଳ ନୀତି ଅବଲମ୍ବନ କରାଯାଉଥିବା ଅଭିଯୋଗ ହେଉଛି।
ସୂଚନା ଅନୁସାରେ, ଜମନକିରା ପଞ୍ଚାୟତ ଅଧୀନରେ ଥିବା ୧୫ ଟି ୱାର୍ଡ ମଧ୍ୟରୁ ସଦରମହକୁମାର ୫ଟି ୱାର୍ଡର ସଫେଇ କାମକୁ ପଞ୍ଚାୟତ ତୁଲାଇବା କଥା। ମାତ୍ର କର୍ତ୍ତୃପକ୍ଷଙ୍କ ଉଦାସୀନତା ଯୋଗୁ ସଫେଇ କାର୍ଯ୍ୟ ଆଦୌ ହେଉ ନ ଥିବା ଅଭିଯୋଗ ହେଉଛି। ମାସ ମାସ ଧରି ସଫେଇ କାର୍ଯ୍ୟ ହେଉନଥିବାରୁ ପୁତିଗନ୍ଧମୟ ପରିବେଶ ସୃଷ୍ଟି ହେଉଛି। ଏଥିପାଇଁ ଲୋକେ ସଂକ୍ରାମକ ରୋଗର ଶିକାର ହେଉଥିବା ଦେଖାଦେଇଛି। ଗ୍ରାମବାସୀ ଏନେଇ ପଲ୍ଲୀସଭା ତଥା ଗ୍ରାମସଭାରେ ପ୍ରସ୍ତାବ ରଖୁଥିବା ବେଳେ କେବଳ ନଥିପତ୍ରରେ ଏହା ଲିପିବଦ୍ଧ ହୋଇ ରହୁଥିବା ଅଭିଯୋଗ ହେଉଛି। ସଫେଇ କାର୍ଯ୍ୟରେ ନିୟୋଜିତ ଥିବା ଚତୁର୍ଥ କର୍ମଚାରୀ ଅଳିଆ ଆବର୍ଜନାକୁ ସଫା କରାଯାଉଥିବା କହି ଠିକ୍ ସମୟରେ ଦରମା ଉଠାଇ ନେଉଛନ୍ତି। ବାସ୍ତବରେ କିନ୍ତୁ ସଫା ହେଉ ନ ଥିବା ଜଣାଯାଇଛି। ଏନେଇ ଯେତେ ଅଭିଯୋଗ କଲେ ସୁଦ୍ଧା ପ୍ରତିକାର କରାଯାଉନାହିଁ।
ଏ ସଂକ୍ରାନ୍ତରେ ପଞ୍ଚାୟତ ନିର୍ବାହୀ ଅଧିକାରୀ କ୍ଷୀରୋଦ ଚନ୍ଦ୍ର ଖାଡ଼ିଆଙ୍କୁ ଯୋଗାଯୋଗ କରିବାରୁ ଶ୍ରମିକ ମିଳୁ ନ ଥିବା କହୁଥିବା ବେଳେ ସରପଞ୍ଚ ଭାସ୍କର ଚନ୍ଦ୍ର ଭୋଇଙ୍କୁ ପଚାରିବାରୁ ସଫା କରାଯିବ ବୋଲି କହିଥିଲେ।
