ବାହାନଗା, ୩୧ା୮(ଡି.ଏନ.ଏ.)-ବାହାନଗା ବ୍ଲକ ପଣପଣା ପଞ୍ଚାୟତ ପରିସରରେ ଶୁକ୍ରବାର କେନ୍ଦ୍ର ରାଷ୍ଟ୍ରମନ୍ତ୍ରୀ ପ୍ରତାପ ଷଡଙ୍ଗୀଙ୍କ ଦ୍ୱାରା ଜନଶୁଣାଣି ଅନୁଷ୍ଠିତ ହୋଇଛି ା କେନ୍ଦ୍ର ସରକାରଙ୍କ ଯୋଜନା ମଧ୍ୟରୁ ମୁଖ୍ୟତଃ ୩ଟି ଯୋଜନା ଉପରେ ଦଳର କର୍ମକର୍ତ୍ତାମାନେ ଲୋକମାନଙ୍କୁ ସଚେତନ କରାଇଥିଲେ। ଏହାସହ କେନ୍ଦ୍ର ରାଷ୍ଟ୍ରମନ୍ତ୍ରୀ ଷଡଙ୍ଗୀ ୩୭୦ ଧାରା ଉଚ୍ଛେଦ ସମ୍ପର୍କରେ ଲୋକମାନଙ୍କୁ ସଚେତନ କରାଇବା ପାଇଁ କର୍ମୀ ଓ କର୍ମକର୍ତ୍ତାମାନେ ନିର୍ଦ୍ଦେଶ ଦେଇଥିଲେ। ସେହିପରି ପ୍ରଧାନମନ୍ତ୍ରୀ ଆବାସ ଯୋଜନାରେ କୌଣସି ହିତାଧିକାରୀମାନେ ଯେପରି ବାଦ୍ ନ ପଡିବେ ତାହା ଉପରେ ଦଳର କର୍ମକର୍ତ୍ତାମାନେ ସଜାଗ ରହି କାର୍ଯ୍ୟ କରିବାକୁ ପରାମର୍ଶ ଦେଇଥିଲେ। ଏହି ଜନଶୁଣାଣିରେ ନୀଳଗିରି ବିଧାୟକ ଇଂ ସୁକାନ୍ତ ନାୟକ ଯୋଗ ଦେଇଥିଲେ। ସଭାରେ ପଣପଣା ପଞ୍ଚାୟତର ବରିଷ୍ଠ ନେତା ବୈରାଗୀ ଚରଣ ବେହେରା ସଭାପତିତ୍ୱ କରିଥିଲେ। ଅନ୍ୟମାନଙ୍କ ମଧ୍ୟରେ ନୀଳଗିରି ନିର୍ବାଚନମଣ୍ଡଳୀର ନେତ୍ରୀ ସୁଷମା ବିଶ୍ୱାଳ, ଦାଣ୍ଡକାଳୀ ମଣ୍ଡଳ ସଭାପତି ଦିଲୀପ କୁମାର ଦାସ, ସରପଞ୍ଚ ସୁନୀତା ଦାସ, ସମିତିସଭ୍ୟ ପୂର୍ଣ୍ଣଚନ୍ଦ୍ର ସ, ବରିଷ୍ଠ ସଦସ୍ୟ ପୂର୍ଣ୍ଣଚନ୍ଦ୍ର ମହାପାତ୍ରଙ୍କ ସମେତ ବହୁ କର୍ମକର୍ତ୍ତା ଉପସ୍ଥିତ ଥିଲେ ା ପରେ ପଞ୍ଚାୟତର ବିଭିନ୍ନ ଗ୍ରାମ ଓ ୱାର୍ଡରୁ ଆସିଥିବା ଦଳୀୟ କର୍ମୀ ଓ ସାଧାରଣ ଲୋକମାନଙ୍କଠାରୁ ବିଭିନ୍ନ ଅଭିଯୋଗ ଗ୍ରହଣ କରିବା ସହିତ ତାହା କିପରି ସମାଧାନ ହୋଇପାରିବ ସେ ବାବଦରେ ଉପରିସ୍ଥ ଅଧିକାରୀଙ୍କୁ କେନ୍ଦ୍ରମନ୍ତ୍ରୀ ଷଡଙ୍ଗୀ ଓ ବିଧାୟକ ନାୟକ ଫୋନ ମାଧ୍ୟମରେ ନିର୍ଦ୍ଦେଶ ଦେଇ ଥିଲେ। ଶିବିରରେ ୨ଶହରୁ ଊର୍ଦ୍ଧ୍ୱ ଅଭିଯୋଗ ହୋଇଥିଲା। ସାଧାରଣତଃ ବିଦ୍ୟୁତ, ପାଣି, ରାସ୍ତା, ଡ୍ରେନ୍ ଓ ପ୍ରଧାନମନ୍ତ୍ରୀ ଆବାସ ଯୋଜନା ବିଷୟରେ ମନ୍ତ୍ରୀ ଓ ବିଧାୟକଙ୍କୁ ଅଭିଯୋଗ ହୋଇଥିଲା। କାର୍ଯ୍ୟକ୍ରମକୁ ପଞ୍ଚାୟତର ସରପଞ୍ଚ ସୁନିତା ଦାଶ ପରିଚାଳନା କରିଥିଲେ। ପରେ ମନ୍ତ୍ରୀ ଦଳୀୟ ସଭ୍ୟ ସଂଗ୍ରହ, ପ୍ରତି ପଞ୍ଚାୟତରେ ବୃକ୍ଷରୋପଣ ଓ ଲୋକମାନଙ୍କ ସହିତ ସମ୍ପର୍କ ରଖି ସେମାନଙ୍କ ସୁବିଧା ଅସୁବିଧା ବୁଝିବା ସହିତ କିପରି ତାହାର ସମାଧାନ ହେବ ସେନେଇ କାମ କରିବାକୁ କର୍ମୀମାନଙ୍କୁ ଆହ୍ବାନ ଦେଇଥିଲେ। ଭବାନୀ ଶଙ୍କର ଦାଶ ଧନ୍ୟବାଦ ଦେଇଥିଲେ।
