କଣାସ,୮।୧୧(ସ୍ବ.ପ୍ର.)- ପୁରୀ ଜିଲା କଣାସ ତହସିଲଦାର ଶୁକ୍ରବାର ଏକ ପଥର ବୋଝେଇ ଟ୍ରକ୍କୁ ଧରିବାକୁ ଯାଇ ହଟହଟା ହୋଇଛନ୍ତି। ଅପରପକ୍ଷେ ତହସିଲଦାର ଏ ନେଇ ଥାନାରେ ଅଭିଯୋଗ ମଧ୍ୟ କରି ନ ଥିବା ଜଣାପଡିଛି। ସୂଚନା ଅନୁଯାୟୀ, କଣାସ ତହସିଲଦାର ଉମାକାନ୍ତ ରାଉତ ଏକ ବୋଲେରରେ ୩ଜଣ ବ୍ୟକ୍ତିଙ୍କ ସହ ଖୋର୍ଦ୍ଧାରୁ ନୂଆ ଜଗନ୍ନାଥ ସଡ଼କରେ କଣାସ କାର୍ଯ୍ୟାଳୟକୁ ଫେରୁଥିଲେ। ଏହି ସମୟରେ ଆଗରେ ଏକ ପଥର ବୋଝେଇ ମିନି ଟ୍ରକ ଯାଉଥିବା ଦେଖି ଅଟକାଇବାକୁ ଚେଷ୍ଟା କରିଥିଲେ। ଏହାଦେଖି ଟ୍ରକ ଡ୍ରାଇଭର ଜଣକ ଜଗନ୍ନାଥ ସଡ଼କ ଛାଡ଼ି ଚୁପୁରିଙ୍ଗି ଗ୍ରାମ ମଧ୍ୟକୁ ଚାଲିଯାଇଥିଲେ। ତହସିଲଦାର ମଧ୍ୟ ଟ୍ରକ ପଛେ ପଛେ ଗାଁ ଭିତରକୁ ଯିବା ସମୟରେ ଏକ ବାଛୁରୀକୁ ତାଙ୍କ ବୋଲେରଟି ଧକ୍କା ଦେଇଥିଲା। ତହସିଲଦାର ପଥର ଗାଡ଼ିକୁ ପିଛା କରୁଥିବା ଗ୍ରାମର କେତେଜଣ ଲୋକ ଜାଣିବା ପରେ ତାଙ୍କ ଗାଡ଼ିକୁ ଘେରିଯାଇଥିଲେ। ତହସିଲଦାର ସେମାନଙ୍କୁ ବୁଝାଶୁଝା କରିଥିଲେ ମଧ୍ୟ ବଚସା ହୋଇ ଉତ୍ତେଜନା ପରିସ୍ଥିତି ସୃଷ୍ଟି ହୋଇଥିଲା। ଫଳରେ ତହସିଲଦାର ସେଠାରୁ ଚାଲିଯାଇଥିଲେ ମଧ୍ୟ ଘଟଣା ବିଷୟରେ ଗଡ଼ିଶାଗୋଦା ଥାନାକୁ ନ ଜଣାଇ ନିଜ କାର୍ଯ୍ୟାଳୟକୁ ଫେରିଆସିଥିଲେ। ଏ ସମ୍ପର୍କରେ ତହସିଲଦାରଙ୍କ ଟେଲିଫୋନ୍ ନଂ(୭୦୭୭୫୫୦୧୪୫)ରେ ଯୋଗାଯୋଗ କରିଥିଲେ ମଧ୍ୟ ସେ ଫୋନ ଉଠାଇ ନ ଥିଲେ। ଏ ନେଇ ଗଡ଼ିଶାଗୋଦା ଥାନାଧିକାରୀ ଶଙ୍କର୍ଷଣ ଦଳାଇଙ୍କୁ ପଚାରିବାରୁ ଏଭଳି ଘଟଣା ନେଇ ତହସିଲଦାରଙ୍କ ପକ୍ଷରୁ କୌଣସି ଅଭିଯୋଗ ହୋଇ ନ ଥିବା କହିଥିଲେ।
