ନୂଆଦିଲ୍ଲୀ,୧୧ା୪(ପି.ଟି): ପଦ୍ମଶ୍ରୀ ପୁରସ୍କାରପ୍ରାପ୍ତ ପ୍ରଖ୍ୟାତ ହିନ୍ଦୁସ୍ତାନୀ ଶାସ୍ତ୍ରୀୟ ସଙ୍ଗୀତ ଗାୟିକା ଶାନ୍ତି ହୀରାନନ୍ଦ ଚାଓ୍ବଲାଙ୍କର ଶୁକ୍ରବାର ସକାଳେ ଗୁରୁଗ୍ରାମ ହସ୍ପିଟାଲରେ ପରଲୋକ ହୋଇଯାଇଛି। ତାଙ୍କୁ ୮୭ ବର୍ଷ ହୋଇଥିଲା। ଅସୁସ୍ଥତା କାରଣରୁ ରବିବାରଠାରୁ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲାବେଳେ ଗୁରୁବାର ରାତିରେ ତାଙ୍କ ସ୍ବାସ୍ଥ୍ୟାବସ୍ଥା ଗୁରୁତର ହୋଇଥିଲା ବୋଲି ପୁଅ ନିଶ୍ଚିନ୍ତ ଚାଓ୍ବଲା କହିଛନ୍ତି। ସେ ଲାହୋର, ଇସ୍ଲାମାବାଦ, ଟରଣ୍ଟୋ,ବୋଷ୍ଟନ, ନ୍ୟୁୟର୍କ, ଓ୍ବାଶିଂଟନ ସମେତ ବିଶ୍ୱର ବିଭିନ୍ନ ମଞ୍ଚରେ ସଙ୍ଗୀତ ପରିବେଷଣ କରି ଖ୍ୟାତି ଅର୍ଜନ କରିଥିଲେ। କିମ୍ବଦନ୍ତୀ ଗଜଲ ଗାୟକ ବେଗମ୍ ଅଖତରଙ୍କ ପରିବେଷଣ ଢାଞ୍ଚାକୁ ସେ ନିଜ ସଙ୍ଗୀତ ମାଧ୍ୟମରେ ଉଜ୍ଜୀବିତ କରି ରଖିଥିଲେ।
