ଓ୍ବେଲିଂଟନ, ୨୮ା୪: ‘କ୍ରିକେଟିଂ ବ୍ରେନ୍’ ପାଇଁ ବିଶ୍ୱ କ୍ରିକେଟରେ ପରିଚିତ ଲାଭ କରିଥିବା ନ୍ୟୁଜିଲାଣ୍ଡ ଅଧିନାୟକ କେନ୍ ୱିଲିୟମସନ ନିଜେ ଜଣେ ମ୍ୟାଚ ବିଜେତା। ସେ କ୍ରିଜ୍ରେ ଥିବା ପର୍ଯ୍ୟନ୍ତ ଦଳର ବିଜୟ ଆଶା ବଳବତ୍ତର ରହିଥାଏ। ଇଣ୍ଡିଆନ ପ୍ରିମିୟର ଲିଗ୍ରେ ସନ୍ରାଇଜର୍ସ ହାଇଦ୍ରାବାଦ ପକ୍ଷରୁ ଦୀର୍ଘଦିନଧରିି ଖେଳି ଆସିଥିବା କେନ୍ ନିକଟରେ ନିଜ ଟିମ୍ମେଟ୍ ଡେଭିଡ୍ ୱାର୍ନରଙ୍କ ସହ ଇନ୍ଷ୍ଟାଗ୍ରାମ ଲାଇଭ୍ ସେସନରେ ଏକ ପ୍ରଶ୍ନର ଉତ୍ତରରେ ନିଜ ମନ ପସନ୍ଦର ବ୍ୟାଟ୍ସମ୍ୟାନଙ୍କ ନାମ ପ୍ରକାଶ କରିଛନ୍ତି। ବିଶ୍ୱ କ୍ରିିକେଟରେ ବର୍ତ୍ତମାନର ଶ୍ରେଷ୍ଠ ବ୍ୟାଟ୍ସମ୍ୟାନ କିଏ ବୋଲି ପ୍ରଶ୍ନ କରିଥିଲେ ୱାର୍ନର। ଜବାବରେ ୱିଲିୟମସନ କହିଥିଲେ ଯେ, କୌଣସି ଜଣଙ୍କ ନାମ ନେବା କଷ୍ଟକର। ତେବେ ଟିମ୍ ଇଣ୍ଡିଆ ଅଧିନାୟକ ବିରାଟ କୋହଲି ଓ ଦକ୍ଷିଣ ଆଫ୍ରିକା ଗ୍ରେଟ୍ ଏବି ଡି’ଭିଲର୍ସ ମୋ ମତରେ ଶ୍ରେଷ୍ଠ। ଡି’ଭିଲର୍ସ ଏବେ କେବଳ ଫ୍ରାଞ୍ଚାଇଜ୍ କ୍ରିକେଟ ଖେଳୁଥିଲେ ହେଁ ସେ ଜଣେ ସାମର୍ଥ୍ୟବାନ ଖେଳାଳି। ଆମ ସମୟରେ ଅନେକ କ୍ବାଲିଟି ଖେଳାଳି ରହିଥିବାବେଳେ ଡି’ଭିଲର୍ସ ସ୍ବତନ୍ତ୍ର। ଜଣେ ଭଲ ଖେଳାଳି ସହିତ ଭଲ ମଣିଷ ମଧ୍ୟ। କୋହଲି ସମସ୍ତ ଫର୍ମାଟରେ ସଫଳତା ପାଇଁ ଭୋକିଲା ଥାଆନ୍ତି। ତାଙ୍କ ଖେଳ ଦେଖିବାକୁ ଏବଂ ସେଥିରୁ କିଛି ଶିଖିବାକୁ ଇଚ୍ଛାହୁଏ। ପ୍ରଦର୍ଶନ ଦ୍ୱାରା ସେ ଭାରତୀୟ ଦଳକୁ ଏକ ଭିନ୍ନ ସୋପାନରେ ପହଞ୍ଚାଇ ଦେଇଛନ୍ତି ବୋଲି ୱିଲିୟମସନ ପ୍ରକାଶ କରିଛନ୍ତି ।
