ଦୁବାଇ,୧୪।୧: କୁହାଯାଏ ମଣିଷ ପଣିଆ ହିଁ ସବୁଠାରୁ ବଡ଼ ଗୁଣ। ଏହାର ସଦ୍ୟତମ ଉଦାହରଣ ପାଲଟିଛନ୍ତି ଦୁବାଇର ଜଣେ ପାକିସ୍ତାନୀ ଡ୍ରାଇଭର। କାର୍ରେ ବୁଲିଥିବା ରୈଶେଲ ରୋଜ୍ ନାମକ ଭାରତୀୟ ଯୁବତୀ ତାଙ୍କ ପର୍ସ ଭୁଲ୍ ବଶତଃ ଛାଡ଼ି ଦେଇଥିଲେ। ରୈଶଲଙ୍କ ପରେ ଅନ୍ୟ କିଛି ଯାତ୍ରୀ କାର୍ରେ ଯାତ୍ରା କରିଥିଲେ। କାର୍ରେ ପର୍ସ ପଡ଼ିଥିବା ଦେଖି ଡ୍ରାଇଭର ମୋଦାସର୍ ଖାଦିମ୍ ଏହା କାହାର ବୋଲି ପଚାରିଥିଲେ। ତେବେ ଯାତ୍ରୀମାନେ ଏହା ସେମାନଙ୍କର ନୁହେଁ ବୋଲି ଉତ୍ତର ଦେଇଥିଲେ। ପର୍ସ ଖୋଲି ଖାଦିମ୍ ରୈଶଲଙ୍କ ଫଟୋ ଦେଖିଥିଲେ। ପର୍ସରେ ଏକ ହଜାର ଦିରହମ୍ ଥିଲା। ତେବେ ରୈଶଲ ସେତେବେଳକୁ ଦୁବାଇ ଛାଡ଼ି ମାଞ୍ଚେଷ୍ଟର ପଳାଇ ଯାଇଥିଲେ। ଖାଦିମ୍ ଦୁବାଇର ସଡ଼କ ପରିବହନ କର୍ତ୍ତୃପକ୍ଷଙ୍କ ସହାୟତା ଲୋଡ଼ିଥିଲେ। ଶେଷରେ ରୈଶଲଙ୍କୁ ତାଙ୍କ ପର୍ସ ଫେରାଇ ଦିଆଯାଇଥିଲା। ଏବେ ଖାଦିମ୍ଙ୍କ କାହାଣୀ ସୋସିଆଲ୍ ମିଡ଼ିଆରେ ବେଶ୍ ଭାଇରାଲ ହେବାରେ ଲାଗିଛି।
