ବିଜୟଓ୍ବାଡା,୧୦।୧୨: ସାରା ଦେଶରେ ପିଆଜର ଦରବୃଦ୍ଧି ଲୋକଙ୍କୁ କନ୍ଦାଉଛି। ଏହାର ବର୍ଦ୍ଧିତ ଦର ସିଧାସଳଖ ଲୋକଙ୍କ ପକେଟ ଉପରେ ପଡ଼ୁଛି। ଆନ୍ଧ୍ରପ୍ରଦେଶରେ ସବ୍ସିଡିରେ ମିଳୁଥିବା ପିଆଜକୁ କିଣିବା ପାଇଁ ଧାଡିରେ ଠିଆ ହୋଇଥିବା ଜଣେ ବ୍ୟକ୍ତିଙ୍କ ହୃଦ୍ଘାତରେ ମୃତ୍ୟୁ ହୋଇଛି। ସୂଚନାଯୋଗ୍ୟ, ସୋମବାର କୃଷ୍ଣା ଜିଲା ଗୁଡିଓ୍ବାଡାର କସ୍ବେରେ ୫୫ବର୍ଷୀୟ କୃଷକ ଆର୍ ସମ୍ବେୟା ସବ୍ସିଡିରେ ଦିଆଯାଉଥିବା ପିଆଜ ପାଇଁ ଲମ୍ବା ଲାଇନ୍ରେ ଛିଡା ହୋଇଥିଲେ। ସେହି ସମୟରେ ତାଙ୍କୁ ହୃଦ୍ଘାତ ହେବାରୁ ଅଚେତ୍ ହୋଇ ତଳେ ପଡ଼ିଯାଇଥିଲେ। ହସ୍ପିଟାଲକୁ ନିଆଯାଉଥିବା ସମୟରେ ହିଁ ତାଙ୍କର ମୃତ୍ୟୁ ହୋଇଥିଲା। ସମ୍ବେୟାଙ୍କ ପରିବାରରେ ତାଙ୍କ ସ୍ତ୍ରୀ ଓ ୨ସନ୍ତାନ ଅଛନ୍ତି। ତେବେ ପିଆଜ ଦରବୃଦ୍ଧିକୁ ନେଇ ହୋଇଥିବା ମୃତ୍ୟୁ ଘଟଣା ଦେଶରେ ଏହା ପ୍ରଥମ।
