ନୂଆଦିଲ୍ଲୀ,୪ା୬(ପି.ଟି.)-ତତ୍କାଳ ତିନି ତଲାକ୍ ପ୍ରଥାକୁ ନିଷିଦ୍ଧ କରିବା ଲାଗି ସରକାର ପାର୍ଲାମେଣ୍ଟରେ ପୁଣି ଥରେ ବିଲ୍ ଆଣିବେ। କେନ୍ଦ୍ର ଆଇନ ମନ୍ତ୍ରୀ ରବିଶଙ୍କର ପ୍ରସାଦ ସୋମବାର ଏହି ସୂଚନା ଦେଇଛନ୍ତି। ପୂର୍ବରୁ ଏହି ବିଲ୍ ନିମ୍ନ ସଦନରେ ଗୃହୀତ ହୋଇ ରାଜ୍ୟ ସଭାର ଅନୁମୋଦନ ଅପେକ୍ଷାରେ ପଡିରହିଥିବାବେଳେ ଷୋଡ଼ଶ ଲୋକ ସଭା ଭଙ୍ଗ ହେବାରୁ ତାହା ରଦ୍ଦ ହୋଇଯାଇଥିଲା। ସରକାରଙ୍କର ସଂଖ୍ୟାଗରିଷ୍ଠତା ନ ଥିବା ରାଜ୍ୟ ସଭାରେ ବିପକ୍ଷ ଦଳ ବିଲ୍ର ବିଭିନ୍ନ ଧାରାକୁ ବିରୋଧ କରିବାରୁ ତାହା ଗୃହୀତ ହୋଇପାରି ନ ଥିଲା। ତିନି ତଲାକ ଭାଜପା ନିର୍ବାଚନୀ ଇସ୍ତାହାରର ଅଂଶବିଶେଷ ହୋଇଥିବାରୁ ଏହା ଉପରେ ପୁନର୍ବାର ବିଲ୍ ଆସିବ ବୋଲି ରବିଶଙ୍କର କହିଛନ୍ତି। ୟୁନିଫର୍ମ ସିଭିଲ କୋଡ୍ (ସମାନ ନାଗରିକ ସଂହିତା) ସମ୍ପର୍କରେ ପ୍ରଶ୍ନ ହେବାରୁ ଆଇନ ମନ୍ତ୍ରୀ କହିଥିଲେ, ଆଇନ କମିଶନଙ୍କ ରିପୋର୍ଟକୁ ଅନୁଧ୍ୟାନ କରାଯାଉଛି। ଏଥିସହିତ ଏହି ପ୍ରସଙ୍ଗରେ ସରକାର ରାଜନୈତିକ ପରାମର୍ଶ ଗ୍ରହଣ କରିବେ ବୋଲି ସେ କହିଛନ୍ତି।
