କବିସୂର୍ଯ୍ୟନଗର,୨୩ା୧୦- କବିସୂର୍ଯ୍ୟନଗର ଥାନା ସୁନାରୀଝୋଳା ପଞ୍ଚାୟତର ପଙ୍କଳବାଡ଼ି ଗ୍ରାମ ବେଲପୁର ସାହିରେ ସମ୍ପତ୍ତିକୁ ନେଇ ଦୁଇ ପରିବାର ମଧ୍ୟରେ ମାରପିଟ ହୋଇଛି। ଶେଷରେ ପୁତୁରା ଛୁରାମାଡ଼ରେ ଦାଦାର ମୃତ୍ୟୁ ଘଟିଛି। ମୃତକ ହେଲେ ଟି. ଶମ୍ବାରିଆ ରେଡ୍ଡୀ (୭୫)। ପ୍ରକାଶ ଯେ, ଶମ୍ବାରିଆଙ୍କ ଏକମାତ୍ର ଭଉଣୀ ବିବାହ କରି ନ ଥିଲେ। ଫଳରେ ପୈତୃକ ସମ୍ପତ୍ତି ଶାମ୍ବାରିଆଙ୍କ ଭାଇ ଓ ଭଉଣୀଙ୍କ ମଧ୍ୟରେ ବଣ୍ଟା ହୋଇଥିଲା। ଭଉଣୀ ଭାଗରେ ୪ ଭରଣ ଜମି ଓ ଏକ ଘର ପଡିଥିଲା। ଯିଏ ଭଉଣୀଙ୍କୁ ଭରଣପୋଷଣ କରିବ ସେ ଜମି ଘର ନେବ ବୋଲି ନିଷ୍ପତି ହୋଇଥିଲା। ଶମ୍ବାରିଆ ଓ ତାଙ୍କ ଭାଇ ମଧ୍ୟରେ ଭଉଣୀଙ୍କୁ ପୋଷିବାକୁ ନେଇ ବିବାଦ ଲାଗି ରହିଥିଲା। ମାତ୍ର ସମ୍ପତ୍ତି ନେଇ ଶମ୍ବାରିଆଙ୍କ ଭାଇ ଭଉଣୀଙ୍କୁ ଘରେ ରଖୁ ନଥିଲେ। ଏନେଇ ଶମ୍ବାରିଆ ଭାଇଙ୍କୁ ପଚାରିବାପରେ ୨ଭାଇଙ୍କ ପୁଅମାନଙ୍କ ମଧ୍ୟରେ ସୋମବାର ରାତିରେ ମାରପିଟ ହୋଇଥିଲା। ଦାଦା ସମ୍ବାରିଆଙ୍କ ଛାତିରେ ପୁତୁରା ଛୁରି ଭୁସି ଦେଇଥିଲେ। ଗୁରୁତର ଅବସ୍ଥାରେ ରାତି ପ୍ରାୟ ୧୦ଟାରେ ଗ୍ରାମବାସୀ ଉଦ୍ଧାର କରି ତାଙ୍କୁ କବିସୂର୍ଯ୍ୟନଗର ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ। ସେଠାରେ ତାଙ୍କର ମୃତ୍ୟୁ ଘଟିଥିଲା। ପୋଲିସ ସ୍ବାସ୍ଥ୍ୟକେନ୍ଦ୍ରରେ ପହଞ୍ଚତ୍ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ଆସିକା ପଠାଇଥିଲା। ମଙ୍ଗଳବାର ବ୍ୟବଚ୍ଛେଦ ପରେ ମୃତଦେହ ପରିବାରକୁ ହସ୍ତାନ୍ତର କରାଯାଇଛି। ମୃତକଙ୍କ ପୁଅ ଟି. ବିକ୍ରମ ରେଡ୍ଡୀଙ୍କ ଏତଲାକ୍ରମେ ପୋଲିସ ନଂ.୨୫୬/୧୯ରେ ମାମଲା ରୁଜୁ କରି ସାଇଣ୍ଟିଫିକ ଟିମ ସହାୟତାରେ ତଦନ୍ତ ଚଳାଇଛି। ୪ ଜଣଙ୍କୁ ଥାନାରେ ଅଟକ
ରଖି ପଚରାଉଚରା ଚାଲିଥିବା ଏସ୍ଆଇ ଅଜୁର୍ନ କଅଁର ସୂଚନା ଦେଇଛନ୍ତି।
