ଧର୍ମଶାଳା,୧୮।୫(ଡି.ଏନ.ଏ.)- ସାମୁଦ୍ରିକ ବାତ୍ୟା ‘ଫନୀ’ ପରେ ସମଗ୍ର ପୁରୀ ସହରରେ ତୁଳସୀପତ୍ରର ଅଭାବ ସୃଷ୍ଟି ହୋଇଥିବା ଜଣାପଡିଛି। ଏହା ଜଣାପଡ଼ିବା ପରେ ଧର୍ମଶାଳା ଥାନା ଜାରକା ଅନ୍ତର୍ଗତ ଭାଲୁଖାଇସ୍ଥିତ ଶ୍ରୀଜଗନ୍ନାଥ ମନ୍ଦିର ପକ୍ଷରୁ ୭ବେତା ତୁଳସୀପତ୍ର ଓ ଗୋଟିଏ ପଦ୍ମଫୁଲ ଝୁଡି ସମେତ ବିଭିନ୍ନ ପ୍ରକାର ଫୁଲ ସଂଗ୍ରହ କରାଯାଇ ପୁରୀ ପଠାଯାଇଛି। ଭାଲୁଖାଇସ୍ଥିତ ଜଗନ୍ନାଥ ମନ୍ଦିର କମିଟି ପକ୍ଷରୁ ଇନ୍ଦ୍ରମଣି ମହାନ୍ତି, କେଳୁ ଚରଣ ନାୟକ, ଅଶୋକ କୁମାର ଜେନା, ସବ୍ୟସାଚୀ ବେହେରା, କଳ୍ପତରୁ ସାହୁ, ସୁନୀଲ କୁମାର ରାଉତରାୟ, ପ୍ରଦୀପ୍ତ ରାଉତ, ପ୍ରଫୁଲ୍ଲ କୁମାର ସର, ସୁରେନ୍ଦ୍ର ସାହୁଙ୍କ ସମେତ ୧୮ ଜଣ ଜଗନ୍ନାଥ ପ୍ରେମୀ ପୁରୀ ଯାତ୍ରାକରି ମନ୍ଦିର କାର୍ଯ୍ୟାଳୟରେ ତୁଳସୀପତ୍ର ଅର୍ପଣ କରିଥିଲେ। ଏହି ତୁଳସୀପତ୍ର ଓ ଫୁଲ ଗୁଡିକୁ ସଂଗ୍ରହ କରିବାରେ ପ୍ରସନ୍ନ କୁମାର ବରାଳ, ଅବଧୂତ ରାଉତ, ପିତାମ୍ବର ଜେନା, କାର୍ତ୍ତିକଚନ୍ଦ୍ର ସ୍ବାଇଁ, ବୀର ପାଢୀ ପ୍ରମୁଖ ସହଯୋଗ କରିଥିଲେ। ପୂର୍ବରୁ ମଧ୍ୟ ଧର୍ମଶାଳା ବ୍ଲକ କବାଟବନ୍ଧ ଅଞ୍ଚଳରେ ଥିବା ସଚେତନ ମଞ୍ଚ ପକ୍ଷରୁ ତୁଳସୀପତ୍ର ସଂଗ୍ରହ କରି ପୁରୀ ପ୍ରେରଣ କରାଯାଇଥିଲା।
