ଚିତ୍ରଡ଼ା,୬ା୫(ଡି.ଏନ୍.ଏ.)- ବହୁ ଦିନର ଦାବି ପରେ ମୟୂରଭଞ୍ଜ ଜିଲାର କିଶାନତାଣ୍ଡି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ୨ଟି ନୂଆ ୧୦୮ ଆମ୍ବୁଲାନ୍ସ ଯୋଗାଇ ଦିଆଯାଇଛି। ପୂର୍ବରୁ ରାସଗୋବିନ୍ଦପୁର ଏବଂ ମୋରଡାରେ ଥିବା ୨ଟି ୧୦୮ ଆମ୍ବୁଲାନ୍ସ ପୁରୁଣା ହେବାରୁ ରୋଗୀ ବିଭିନ୍ନ ସମସ୍ୟାର ସମ୍ମୁଖୀନ ହେଉଥିଲେ। ରୋଗୀଙ୍କୁ ଡାକ୍ତରଖାନା ନେଇ ଯାଉଥିବା ବେଳେ ଉକ୍ତ ଆମ୍ବୁଲାନ୍ସ ୨ଟିର ଚକା ବିଭିନ୍ନ ସ୍ଥାନରେ ପମ୍ପଚର ହେଉଥିଲା ତ କେଉଁଠି ଷ୍ଟାର୍ଟ ବନ୍ଦ ହୋଇ ଯାଉଥିଲା। ବିଭିନ୍ନ ସ୍ବେଚ୍ଛାସେବୀ ସଂଗଠନ ପକ୍ଷରୁୁ ବାରମ୍ବାର ଦାବି ପରେ ମଙ୍ଗଳବାର ରାଜ୍ୟ ସରକାର ୨ଟି ନୂଆ ୧୦୮ ଆମ୍ବୁଲାନ୍ସ କିଶାନତାଣ୍ଡି ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରକୁ ଯୋଗାଇ ଦେଇଛନ୍ତି। ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ମେଡିକାଲ ଅଫିସର ସଂଗ୍ରାମ ସାହୁଙ୍କ ସୂଚନା ଅନୁଯାୟୀ, ୨ଟି ଆମ୍ବୁଲାନ୍ସ ମଧ୍ୟରୁ ଗୋଟିଏ ଚିତ୍ରଡା ମେଡିକାଲକୁ ମିଳିଥିବା ବେଳେ ଅନ୍ୟଟି ରାସଗୋବିନ୍ଦପୁର ଡାକ୍ତରଖାନାକୁ ପ୍ରଦାନ କରାଯାଇଛି। ମେଡ଼ିକାଲ ଅଫିସର, ୧୦୮ କ୍ଲଷ୍ଟରଲିଡର ସାୟନ ବୋଷ, ୧୦୮ କର୍ମଚାରୀ ଏବଂ ସ୍ବାସ୍ଥ୍ୟକେନ୍ଦ୍ରର ଅନ୍ୟାନ୍ୟ କର୍ତ୍ତୃପକ୍ଷଙ୍କ ଉପସ୍ଥିତିରେ ଏହି ୨ଟି ଆମ୍ବୁଲାନ୍ସ ଗଡ଼ିଥିଲା। ଏନେଇ ସାଧାରଣରେ ସନ୍ତୋଷ ପ୍ରକାଶ ପାଇଛି।
