ଦିଗପହଣ୍ଡି,୧୧।୬(ଡି.ଏନ୍.ଏ.): ଦିଗପହଣ୍ଡି ଥାନା ଦକ୍ଷିଣପୁର ଗ୍ରାମରେ ମଙ୍ଗଳବାର ସକାଳ ପ୍ରାୟ ସାଢ଼େ ୮ଟାରେ ପୂର୍ବ ଶତ୍ରୁତାକୁ କେନ୍ଦ୍ରକରି ବାପା, ପୁୁଅଙ୍କୁ ଛୁରାମାଡ଼ ହୋଇଛି। ଏଥିରେ ବାପା ଜି.ଯୋଗେନ୍ଦ୍ର ରେଡ୍ଡୀ ଏବଂ ପୁଅ ଜି.ରାଜେଶ ରେଡ୍ଡୀ ଗୁରୁତର ଆହତ ହୋଇଛନ୍ତି। ଛୁରାମାଡ଼ କରିଥିବା ଅଭିଯୁକ୍ତ ହେଲେ ପି.ଜାଗିଲି ରେଡ୍ଡୀ ଓରଫ ବାୟା।
ପ୍ରକାଶ ଯେ, ଯୋଗେନ୍ଦ୍ର ପେସାରେ ଜଣେ ରାଜମିସ୍ତ୍ରି। ୧୫ ଦିନ ପୂର୍ବେ ଯୋଗେନ୍ଦ୍ର ଗ୍ରାମର ଜଣେ ବ୍ୟକ୍ତିଙ୍କ ଘର କାମ କରୁଥିବା ବେଳେ ପଡ଼ୋଶୀ ଜାଗିଲି ଏହାର ପ୍ରତିବାଦ କରିଥିଲେ। ଏହାକୁ ନେଇ ଉଭୟଙ୍କ ମଧ୍ୟରେ ଯୁକ୍ତିତର୍କ ଓ କଥା କଟାକଟି ହୋଇଥିଲା। ମଙ୍ଗଳବାର ସକାଳେ ଯୋଗେନ୍ଦ୍ର ତାଙ୍କ ଘର ନିକଟରେ ଛିଡ଼ା ହୋଇଥିବା ବେଳେ ଜାଗିଲି ତାଙ୍କ ପେଟକୁ ଛୁରି ଭୁସି ଦେଇଥିଲେ। ଯୋଗେନ୍ଦ୍ରଙ୍କ ପୁଅ ବାପାଙ୍କୁ ଉଦ୍ଧାର କରିବାକୁ ଦୌଡ଼ିଯିବାରୁ ତାଙ୍କ ପିଠିକୁ ଛୁରାମାଡ଼କରି ଫେରାର ହୋଇଯାଇଥିଲେ। ବାପା-ପୁଅଙ୍କୁ ଗୁରୁତର ଅବସ୍ଥାରେ ପ୍ରଥମେ ଦିଗପହଣ୍ଡି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା। ପରେ ଉଭୟଙ୍କୁ ବ୍ରହ୍ମପୁର ବଡ଼ ଡାକ୍ତରଖାନାକୁ ସ୍ଥାନାନ୍ତର କରାଯାଇଥିବା ଥାନା ଆଇଆଇସି ଗୌରାଙ୍ଗଚରଣ ସାହୁ ସୂଚନା ଦେଇଛନ୍ତି।
