ପୋଲସରା,୬।୮(ଡି.ଏନ.ଏ.)-ପୋଲସରାର ପୂର୍ବତନ ବିଧାୟକଙ୍କ ନାଁରେ ଜମି ହଡ଼ପ ଅଭିଯୋଗ ଆସିଛି। ଅବନ୍ତୀନଗରସ୍ଥିତ ପୈତୃକ ଜମିରେ ପୂର୍ବତନ ବିଧାୟକ ନିରଞ୍ଜନ ପ୍ରଧାନ ଚଞ୍ଚକତା କରି ଘର ନିର୍ମାଣ କରିଥିବା ସୋମବାର ପୋଲସରା ଥାନାରେ ଅଭିଯୋଗ କରିଛନ୍ତିି ଜାଗା ପଟ୍ଟାଦାର ବୃଦ୍ଧା ବାସନ୍ତୀ ସାହୁ। ପୋଲସରା ଥାନା ଅଧିକାରୀ ଜିତେନ୍ଦ୍ର କୁମାର ମଲ୍ଲିକ ପୂର୍ବତନ ବିଧାୟକ ପ୍ରଧାନଙ୍କୁ ଥାନାକୁ ଡକାଇଥିଲେ। ଅଭିଯୋଗକାରୀ ପରିବାର ଓ ପୂର୍ବତନ ବିଧାୟକ ନିଜର ଜମିଜମା ସମ୍ପର୍କିତ ସମସ୍ୟା ଥିବା କଥା କହିଥିଲେ। ଏହା ବହୁ ବର୍ଷର ସମସ୍ୟା ହୋଇଥିବାରୁ ତହସିଲଦାରଙ୍କ ଅନୁମୋଦନ ନେଇ ତୁରନ୍ତ ଡିମାର୍କେଶନ୍ କରିବା ପାଇଁ ବାସନ୍ତୀଙ୍କୁ ଥାନା ଅଧିକାରୀ ପରାମର୍ଶ ଦେଇଥିଲେ। ଅନ୍ୟପକ୍ଷରେ ଡିମାର୍କେସନ୍ ସମୟ ଧାର୍ଯ୍ୟ ମଧ୍ୟରେ କେହି ବିଶୃଙ୍ଖଳା ସୃଷ୍ଟି ନ କରିବାକୁ କୁହାଯାଇଥିଲା। ଏ ନେଇ ପୂର୍ବତନ ବିଧାୟକ ପ୍ରଧାନଙ୍କ ସହ ଯୋଗାଯୋଗ କରିବାରୁ ସେ ଉକ୍ତ ଜାଗାରେ ଦୀର୍ଘ ୨୦ ବର୍ଷ ହେଲା ଘର କରି ରହି ଆସୁଥିବା କହିଛନ୍ତି। ତାଙ୍କ ପାଖରେ ଜାଗାର କାଗଜ ପତ୍ର ଅଛି। ତାଙ୍କ ନାମରେ ମିଥ୍ୟା ଆରୋପ କରାଯାଇଛି ବୋଲି ସେ କହିଛନ୍ତି।
