ପଟିଆଲା,୩।୨: ପଟିଆଲା ବିଧାନସଭା ଆସନରୁ କ୍ୟାପଟେନ ଅମରିନ୍ଦର ସିଂଙ୍କୁ ଚ୍ୟାଲେଞ୍ଜ କରିବାକୁ ‘ଚାଚା ମ୍ୟାଗି ୱାଲା’ ମୈଦାନରେ ଅଛନ୍ତି। ‘ଚାଚା ମ୍ୟାଗି ୱାଲା’ ନାମରେ ଜଣାଶୁଣା ଜସବୀର ସିଂ ଦ୍ୱିତୀୟ ଥର ପାଇଁ କ୍ୟାପଟେନ ଅମରିନ୍ଦର ସିଂଙ୍କୁ ବିପକ୍ଷରେ ଲଢିବାକୁ ନିଷ୍ପତ୍ତି ନେଇଛନ୍ତି। ଗତ ଦୁଇଟି ନିର୍ବାଚନରେ ୫୯ ବର୍ଷିୟ ଜସବୀରଙ୍କୁ ଏକ ପରାଜୟର ସାମ୍ନା କରିବାକୁ ପଡିଥିଲା।
ଜସବୀର ସିଂ ପଟିଆଲା ସହରରେ ଏକ ମ୍ୟାଗି ଦୋକାନ ଚଳା। ଏହି କାରଣରୁ ଜସବୀର ସିଂ ‘ଚାଚା ମ୍ୟାଗି ୱାଲା’ ଭାବରେ ଜଣାଶୁଣା। ସେ ମଧ୍ୟ ପଟିଆଲାରୁ ୨୦୧୭ ବିଧାନସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରି ୨୭୩ ଭୋଟ ପାଇଥିଲେ। ୨୦୧୯ ଲୋକ ସଭା ନିର୍ବାଚନରେ ଜସବୀର ପଟିଆଲାରୁ ପ୍ରୀତି କୌରଙ୍କ ବିପକ୍ଷରେ ପ୍ରତିଦ୍ୱନ୍ଦ୍ୱିତା କରି ୧,୧୨୬ ଭୋଟ ପାଇବାରେ ସଫଳ ହୋଇଥିଲେ। ଜସବୀର କହିଛନ୍ତି, ମୋର ସଂଗ୍ରାମ ଦୁର୍ନୀତିଗ୍ରସ୍ତ ବ୍ୟବସ୍ଥା ବିରୋଧରେ। ମାଫିଆକୁ ଶେଷ କରିବା ପାଇଁ ଲଢେଇ କରୁଛି। ରାଜନୈତିକ ଦଳ ମାଫିଆଙ୍କୁ ଟିକେଟ ଦିଅନ୍ତି। ଜିତିବା ପରେ କେବଳ ଟଙ୍କା ରୋଜଗାର କରନ୍ତି। ଲୋକଙ୍କ ଠାରୁ ତାଙ୍କୁ ଭଲ ସମର୍ଥନ ମିଳୁଛି ବୋଲି ଜସବୀର ସିଂ ଦାବି କରିଛନ୍ତି।
ସୂଚନାଯୋଗ୍ୟ, କ୍ୟାପଟେନ ଅମରିନ୍ଦର ସିଂ କଂଗ୍ରେସଠାରୁ ଅଲଗା ହେବା ପରେ ପଞ୍ଜାବ ଲୋକ କଂଗ୍ରେସ ଟିକେଟରେ ପଟିଆଲା ଠାରୁ ପ୍ରତିଦ୍ୱନ୍ଦ୍ୱିତା କରୁଛନ୍ତି। କ୍ୟାପଟେନଙ୍କ ଦଳ ଭାଜପା ସହ ମେଣ୍ଟ କରିଛି। ପଞ୍ଜାବର ସମସ୍ତ ୧୧୭ଟି ଆସନ ପାଇଁ ଫେବୃୟାରୀ ୨୦ରେ ମତଦାନ ଅନୁଷ୍ଠିତ ହେବ।
