ଆସିକା,୨୫ା୭ (ଡି.ଏନ୍.ଏ.) – ଆସିକା ଥାନା ଇଲାକାର ବିଭିନ୍ନ ଗ୍ରାମାଞ୍ଚଳରେ ଚାଲିଥିବା ଚୋରା ରନ୍ଧା ମଦ ଭାଟି ଓ ମଦ ଦୋକାନ ଉପରେ ବୁଧବାର ପୋଲିସ ଓ ଅବକାରୀ ବିଭାଗ ପକ୍ଷରୁ ମିଳିତ ଚଢାଉ କରାଯାଇଥିଲା। ଏହି ଚଢାଉରେ ୧୨୦ ଲିଟର ରନ୍ଧା ମଦ ଜବତ କରାଯିବା ସହ ୩ ହଜାର ଲିଟର ପୋଚ ନଷ୍ଟ କରାଯାଇଛି। ମଦ ପ୍ରସ୍ତୁତିରେ ବ୍ୟବହୃତ ବହୁ ସରଞ୍ଜାମ ଜବତ କରାଯାଇଛି। ଏହି ମାମଲାରେ ସମୁଦାୟ ୯ଜଣଙ୍କୁ ଗିରଫ କରାଯାଇଛି। ଗିରଫଙ୍କ ମଧ୍ୟରେ ପାଣ୍ଡୁ ନାଇକ ଓ ରାଜେଶ୍ୱରୀ ନାୟକ ବାଲିସିରା, ଏନ୍. କବିତା ଓ ଏ. ଜଗନ୍ନାଥମ୍ ଠେଙ୍ଗାପଲ୍ଲୀ, ଏ. ଦୁର୍ଗା ଓ ସୀତା ପ୍ରଧାନ ଗଣ୍ଡପଲ୍ଲୀ, ଡି. ନାଗେଶ୍ୱର ନାରାୟଣପରୁ, ପାଣ୍ଡବ ପ୍ରଧାନ ପାକଲାପଲ୍ଲୀ ଓ ବାବୁ ସୁଅଁାସିଆ ରଘୁନାଥ ନଗର ପ୍ରମୁଖ ଅଛନ୍ତି। ପୋଲିସ ଓ ଅବକାରୀ ବିଭାଗ ପକ୍ଷରୁ ପୃଥକ୍ ପୃଥକ୍ ଭାବେ ଘଟଣା ସମ୍ପର୍କରେ ଆସିକା ଥାନାରେ ନଂ.୨୩୮/୧୯ରେ ମାମଲା ରୁଜୁ କରାଯାଇଥିଲା ବେଳେ ଅବକାରୀ ବିଭାଗ ପକ୍ଷରୁ ୮ ମାମଲା ରୁଜୁ କରାଯାଇଥିବା ଜଣାପଡିଛି। ଗିରଫ ଅଭିଯୁକ୍ତଙ୍କୁ ବୁଧବାର ଅପରାହ୍ନରେ କୋର୍ଟ ଚାଲାଣ କରାଯାଇଛି। ଆସିକା ତହସିଲଦାର୍ ସୁବାସ ଚନ୍ଦ୍ର ସେଠିଆ ଏହି ଚଢାଉରେ କାର୍ଯ୍ୟନିର୍ବାହୀ ମାଜିଷ୍ଟ୍ରେଟ୍ ଭାବେ ସାମିଲ ରହିଥିଲାବେଳେ ଆସିକା ଥାନା ଅଧିକାରୀ ପୀତବାସ ଧାରୁଆ, ଅବକାରୀ ଉପ-ଅଧୀକ୍ଷକ ଅଭିରାମ ବେହେରାଙ୍କ ସମେତ ପୋଲିସ ଓ ଅବକାରୀ ବିଭାଗ କର୍ମଚାରୀ ସାମିଲ୍ ଥିଲେ।
