କର୍ଲାମୁଣ୍ଡା, ୧୩ା୮ (ଡି.ଏନ୍.ଏ.):
ଆଦିବାସୀ ଛାତ୍ରୀମାନେ କେନ୍ଥେଇ ପାଠ୍ ପଢ଼ବାକେ ମନ୍ ବଲାବେ ସେଥିରଲାଗି ସରକାର ଅନେକ ଯୋଜନା କାଯ୍କାରୀ କରୁଛନ୍। ସେନ୍ତା ସରକାର ସବୁ ବ୍ଲକରେ ଗୁଟେ ଗୁଟେ ଆଦିବାସୀ ଛାତ୍ରୀନିବାସ ତିଆର କରବାର ଘୋଷନା କରିଥିଲେ। ହେଲେ ଅନେକ ଜାଗାରେ ପରଶାସନିକ ଅବହେଲାର ଲାଗି ସରକାରକଁର ଇ ମହତ୍ ଯୋଜନାମାନ ଫସର ଫାଟୁଛେ। ଏନ୍ତା ଗୁଟେ ଉଦାହରନ୍ ଦେଖ୍ବାକେ ମିଲିଛେ କଳାହାଣ୍ଡି ଜିଲା କର୍ଲାମୁଣ୍ଡା ବ୍ଲକ ପୌରକେଲାରେ।
ସୂଚନା ଅନ୍ସାରେ ରାଏଜ୍ ସରକାରକଁର ହରିଜନ ଆଦିବାସୀ କଲ୍ୟାଣ ବିଭାଗ ତରଫୁ ପୌରକେଲାରେ ୧୦୦ ସିଟ୍ର ଗୁଟେ ଛାତ୍ରୀନିବାସର ତିଆରି କାମ୍ ୨୦୧୦-୧୧ ସାଲେ ଆରମ୍ ହେଇଥିଲା। ଉଦେଶ୍ ଥିଲା ଅଂଚଲର ଆଦିବାସୀ ଛାତ୍ରୀକୁଁ ଛାତ୍ରୀନିବାସରେ ରଖି ପାଠ୍ ପଢ଼ବାର ବେବସ୍ତା କରବାର। ସେନ୍ତା ଇ ଛାତ୍ରୀନିବାସରେ ୬ଷ୍ଠରୁ ୧୦ମ ଶ୍ରେଣୀ ତକ୍ ଛାତ୍ରୀକୁଁ ରଖ୍ବାର ଉଦେଶ୍ରେ ତିଆର ହେଇଛେ। ହେଲେ ଦୁଖର କଥା ଆଏଜ୍ତକ ଇ ଛାତ୍ରୀନିବାସ କାଯ୍କ୍ଷମ ନାଇଁ ହେଇପାରି। ଇ ବାବ୍ଦେ କର୍ଲାମୁଣ୍ଡା ବ୍ଲକ ମଙ୍ଗଳ ସଂପ୍ରସାରଣ ଅଧ୍କାରୀ ସୁନୀଲ କୁମାର କରକୁଁ ପଚରାଲାରୁ ଆଏଜ୍କେ ୬ ମାସ ହେଲା ଛାତ୍ରୀନିବାସର ଟ୍ରାନ୍ସଫର୍ମର ପୁଡ଼ିଯାଇଛେ। ବିଦ୍ୟୁତ ବିଭାଗ ସଂଗେ ବାରବାର ଯୋଗାଯୋଗ କଲେ ବି ଟ୍ରାନ୍ସଫର୍ମର ମରାମତି ନାଇଁ କରାଯିବାର। ଯେନ୍ଥିରଲାଗି ଛାତ୍ରୀନିବାସକେ କାଯ୍କ୍ଷମ କରବାରେ ବିଲମ୍ ହେଉଛେ ବଲି ସେ କହିଥିଲେ। ସେନ୍ତା ଇ ବାବ୍ଦେ ଛାତ୍ରୀନିବାସ ଦାଇତିଅରେ ଥିବାର ବି.ଆର୍.ଆମ୍ବେଦକର ଉଚ୍ଚ ବିଦ୍ୟାପିଠର ପରଧାନ ଶିକ୍ଷକ ଶ୍ରୀବତ୍ସ ରଣାକୁଁ ପଚରାଲାରୁ ୪୧ ଝନ୍ ଛାତ୍ରୀକଁର ନଁା ଲେଖା ସରିଛେ, ବିଦ୍ୟୁତ ସମସିଆର ଲାଗି ଛାତ୍ରୀନିବାସରେ ଛାତ୍ରୀମାନକୁ ନୁହେ ରଖାଯାଏ ବଲି ସେ କହିଛନ୍। ଇ ବାବ୍ଦେ ବିଦ୍ୟାଲୟ ତରଫୁ ଗଲା ୨୮ା୭ା୨୦୧୯, ଚିଠି ନଂ. ୩୦ରେ ବିଦ୍ୟୁତ ସମସିଆ ବାବ୍ଦେ ସମନ୍ବିତ ଆଦିବାସୀ ଉନ୍ନୟନ ସଂସ୍ଥା ଥୁଆମୂଲ ରାମପୁର, ଭବାନୀପାଟଣାକୁଁ ଚିଠି କରାଯାଇଥିବାର ଜନାଯାଇଛେ। ସେନ୍ତା ଇ ବାବ୍ଦେ ବିଦ୍ୟୁତ ବିଭାଗ ଏସ୍ଡିଓକୁଁ ପଚରାଲାରୁ ଇ ବାବ୍ଦେ ଜେଇକଁର ସଂଗେ କଥା ହେଇ ଯେତେ ଜଲଦି ହେବା ପଦକ୍ଷେପ ନିଆଯିବା ବଲି ସେ କହିଛନ୍।
