ନୂଆଦିଲ୍ଲୀ,୧୯ା୫: ଡିଏମ୍କେ ମୁଖ୍ୟ ଏମ୍.କେ. ଷ୍ଟାଲିନ୍ଙ୍କ ପରେ ଜେଡିଏସ୍ ସୁପ୍ରିମୋ ଦେବେଗୌଡା କଂଗ୍ରେସ ଅଧ୍ୟକ୍ଷ ରାହୁଲଙ୍କ ଗାନ୍ଧୀଙ୍କୁ ପ୍ରଧାନମନ୍ତ୍ରୀ ପଦ ପାଇଁ ଶନିବାର ସମର୍ଥନ କରିଛନ୍ତି। ୮୭ତମ ଜନ୍ମଦିନରେ ସେ ଭେଙ୍କଟେଶ୍ୱର ମନ୍ଦିରରୁ ଫେରି ତିରୁମାଲାରେ ଖବରଦାତାଙ୍କ ସହ ଆଲୋଚନାବେଳେ ପ୍ରଧାନମନ୍ତ୍ରୀ ପ୍ରାର୍ଥୀଭାବେ ଅଣଭାଜପା ମେଣ୍ଟରେ ରାହୁଲ ଉପଯୁକ୍ତ ଓ ଆମେ କଂଗ୍ରେସକୁ ସମର୍ଥନ ଦେବୁ ବୋଲି ପ୍ରକାଶ କରିଛନ୍ତି।
ପୁଅ ତଥା କର୍ନାଟକ ମୁଖ୍ୟମନ୍ତ୍ରୀ ଏଚ୍.ଡି, କୁମାରସ୍ବାମୀ ରାହୁଲ ତାଙ୍କ ଦଳର ପସନ୍ଦ ଓ ପ୍ରଧାନମନ୍ତ୍ରୀ ପଦଲାଗି ଉପଯୁକ୍ତ ବୋଲି କହିଛନ୍ତି। ଆମ ଆଭିମୁଖ୍ୟରେ କୌଣସି ପରିବର୍ତ୍ତନ ହେବନାହିଁ ବୋଲି ସେ ସ୍ପଷ୍ଟ କରିଛନ୍ତି। ପ୍ରକାଶଥାଉ କି, କିଛିଦିନ ପୂର୍ବରୁ ଡିଏମ୍କେ ମୁଖ୍ୟ ଏମ୍.କେ. ଷ୍ଟାଲିନ୍ ରାହୁଲଙ୍କ ପ୍ରଧାନମନ୍ତ୍ରୀ ପଦକୁ ସମର୍ଥନ କରିଥିଲେ। ରାହୁଲଙ୍କୁ ପ୍ରଧାନମନ୍ତ୍ରୀ ପ୍ରାର୍ଥୀ କରିବା ଲାଗି ବିରୋଧୀଙ୍କ ସ୍ବର ଲମ୍ବିବାରେ ଲାଗିଥିବାବେଳେ ଭୋଟ ଫଳାଫଳ ଆସିବା ପରେ ବିରୋଧୀ ମହାମେଣ୍ଟ ଏକାଠି ହୋଇ ପ୍ରଧାନମନ୍ତ୍ରୀ ପଦରେ କାହାକୁ ବସାଯିବ ସେନେଇ ନିଷ୍ପତ୍ତି ନେବେ ବୋଲି କହିସାରିଛନ୍ତି।
