ଛତ୍ରପୁର, ୯।୫(ଡି.ଏନ୍.ଏ.)-ଗଞ୍ଜାମ ଜିଲାରେ କରୋନା ଆକ୍ରାନ୍ତଙ୍କ ସଂଖ୍ୟା ବଢ଼ିବାରେ ଲାଗିଥିବା ବେଳେ ଫେରନ୍ତା ପ୍ରବାସୀଙ୍କ ସଂଖ୍ୟା ମଧ୍ୟ ବୃଦ୍ଧି ପାଉଛି। ଏପରିସ୍ଥଳେ ଗଣମାଧ୍ୟମ ପ୍ରତିନିଧିମାନେ ସମ୍ପୃକ୍ତ ବିଷୟରେ ଖବର ସଂଗ୍ରହ ବେଳେ ସାମାଜିକ ଦୂରତା ଅବଲମ୍ବନ କରୁ ନ ଥିବାକୁ ନେଇ ଜିଲାପାଳ ବିଜୟ ଅମୃତା କୁଲାଙ୍ଗେ ସୂଚନାନାମା ଜାରି କରିଛନ୍ତି। କେତେକ ଗଣମାଧ୍ୟମ ପ୍ରତିନିଧି ପ୍ରବାସୀ ଫେରନ୍ତା ସମ୍ବନ୍ଧୀୟ ଖବର ସଂଗ୍ରହ କରିବାବେଳେ ସାମାଜିକ ଦୂରତା ଅବଲମ୍ବନ କରୁନାହାନ୍ତି। ଏହା ସେ ନିଜେ ଦେଖିଥିବା ଜିଲାପାଳ କହିଛନ୍ତି। ଏଥିଲାଗି ଗଣମାଧ୍ୟମ ପ୍ରତିନିଧିଙ୍କ ପାଇଁ ଏକ ସୂଚନାନାମା ଜାରି ହୋଇଛି।
ଏଥିରେ ଜ଼ିଲାପାଳ କହିଛନ୍ତି, ବହୁ ସଂଖ୍ୟାରେ ପ୍ରବାସୀ ଦେଶର ବିଭିନ୍ନ ରାଜ୍ୟରେ ଅଛନ୍ତି। ଟ୍ରେନ, ବସ୍, ସାଇକେଲ କିମ୍ବା ଚାଲି ଚାଲି ସେମାନେ ଜ଼ିଲାକୁ ଫେରିବାରେ ଲାଗିଛନ୍ତି। ସେମାନେ ହଟସ୍ପଟ ଅଞ୍ଚଳରୁ ଆସୁଛନ୍ତି। ଏପରକି ଅନେକ ସନ୍ଦିଗ୍ଧ ମଧ୍ୟ ଅନ୍ୟ ରାଜ୍ୟରୁ ଗଞ୍ଜାମକୁ ଫେରିବା ମଧ୍ୟରେ ଅଛନ୍ତି। ଏଣୁ ସମସ୍ତ ଗଣମାଧ୍ୟମ ପ୍ରତିନିଧି ନିଜେ ସାବଧାନତା ଓ ପ୍ରତିଷେଧକମୂଳକ ଅବଲମ୍ବନ କରିବା ସହ ମାସ୍କ ପିନ୍ଧିବା, ସାନିଟାଇଜର ଓ ଗ୍ଳୋବ୍ସ ବ୍ୟବହାର କରିବା ଏବଂ ସାମାଜିକ ଦୂରତା ରକ୍ଷା କରିବାକୁ ଜ଼ିଲ୍ଲାପାଳ ଉକ୍ତ ସୂଚନାନାମାରେ ପରାମର୍ଶ ଦେଇଛନ୍ତି। କ୍ୱାରାଣ୍ଟାଇନ ସେଣ୍ଟର ୟକୁ ଯିବା ଏବଂ ଅନ୍ୟ ରାଜ୍ୟରୁ ଫେରୁଥିବା ପ୍ରବାସୀଙ୍କ ମତାମତ ନେବାରୁ ଦୁରେଇ ରହିବାକୁ ଜ଼ିଲାପାଳ କହିଛନ୍ତି। ଏପରିକି କୌଣସି କୋଭିଡ୍ ହସ୍ପିଟାଲକୁ ଯାଆନ୍ତୁ ନାହିଁ । କୌଣସି ଭୟ ଓ ଆତଙ୍କକୁ ପ୍ରତ୍ୟାଖ୍ୟାନ କରିବାରେ ଗଣମାଧ୍ୟମର ବହୁଳ ଭାବରେ ଦାୟିତ୍ୱ ରହିଛି। ଭୟଙ୍କର କରୋନାଠାରୁ ନିଜେ, ନିଜ ପରିବାର ଏବଂ ସମାଜକୁ ମଧ୍ୟ ରକ୍ଷା କରିବାକୁ ଜିଲାପାଳ ପରାମର୍ଶ ଦେଇଛନ୍ତି ।
