ଭୁବନେଶ୍ୱର,୪।୧୦(ବ୍ୟୁରୋ) : ଆଧାର ଲିଙ୍କ୍ ସହ ଆବଶ୍ୟକ ମୂଳ ପ୍ରମାଣପତ୍ର ଦାଖଲ ନ କଲେ ମିଳିବନି ପେନ୍ଶନ। ଭୁବନେଶ୍ୱର ମହାନଗର ନିଗମ (ବିଏମ୍ସି) ପକ୍ଷରୁ ସମସ୍ତ ପେନ୍ଶନଧାରୀଙ୍କୁ ଚେତାବନୀ ନିଆଯାଇଛି। ଏନେଇ ଗତ ୨୪ ତାରିଖ ଦିନ ଏକ ବିଜ୍ଞପ୍ତି ପ୍ରକାଶ ପାଇଥିବାବେଳେ ଆସନ୍ତା ୯ତାରିଖରୁ ନଭେମ୍ବର ୯ ମଧ୍ୟରେ ପ୍ରମାଣପତ୍ର ଦାଖଲ କରିବାକୁ କୁହାଯାଇଛି। ନିର୍ଦ୍ଧାରିତ ସମୟସୀମା ମଧ୍ୟରେ ପ୍ରମାଣପତ୍ର ଦାଖଲ ନ ହେଲେ ବିଏମ୍ସି ଉକ୍ତ ପେନ୍ଶନ୍କୁ ବନ୍ଦ କରିବାକୁ ବାଧ୍ୟହେବେ ବୋଲି କୁହାଯାଇଛି। ଓଡ଼ିଶା ନିଧି ସେବା ପେନ୍ଶନ୍ ନିୟମ-୧୯୮୦ର ଧାରା ୧୦୪, ୧୦୫ ଓ ଅଣନିଧି ସେବା ନିୟମ ୧୯୮୯ର ଧାରା ୯୪(୩) ଅନୁଯାୟୀ ଏହାକୁ କାର୍ଯ୍ୟକାରୀ କରାଯିବା ଲାଗି ନିଗମର ସମସ୍ତ ପେନ୍ଶନ୍ଧାରୀଙ୍କୁ ବିଏମ୍ସି ଅବଗତ କରାଇଛି। ପେନ୍ଶନଧାରୀମାନେ ନିଜର ମୂଳ ପ୍ରମାଣପତ୍ର(ନିର୍ଦ୍ଧାରିତ ଫର୍ମ) ସହ ବ୍ୟାଙ୍କ ପାସ୍ବୁକ୍ ଓ ଆଧାରକାର୍ଡର ଅବିକଳ ନକଲ ଦାଖଲ କରିବାକୁ ବିଏମ୍ସି କହିଛି। ଏ ସଂକ୍ରାନ୍ତରେ ନଗର ଉନ୍ନୟନ ବିଭାଗକୁ ଅବଗତ କରାଇଛି। ପ୍ରମାଣପତ୍ର ଦାଖଲ କରିବା ପରେ ମାସିକ ପେନ୍ଶନ୍ ଦିଆଯିବା ନିମନ୍ତେ ପଦକ୍ଷେପ ନିଆଯିବ ବୋଲି ବିଏମ୍ସି ଉକ୍ତ ବିଜ୍ଞପ୍ତିରେ ଉଲ୍ଲେଖ କରିଛି।
